गत २०१४ सालच्या विधानसभा निवडणुकीत निवडून आलेले मनसेचे एकमेव आमदार शरद सोनावणे यांचा यंदाच्या निवडणुकीत पराभव झाला आहे. ते जून्नरमधून शिवसेनेच्या तिकीटावर निवडणूक लढवत होते. राष्ट्रवादी काँग्रेसचे उमेदवार अतुल बेनके यांनी शरद सोनावणेंचा पराभव केला. २००९ सालच्या विधानसभा निवडणुकीत घवघवीत यश मिळवत मनसेचे राज्यात १३ आमदार निवडून आले होते. पण २०१४ मध्ये शरद सोनावणे यांच्या रुपाने मनसेचा एकमेव आमदार निवडून आला. लोकसभा निवडणुकीच्या आधी शरद सोनावणे यांनी शिवसेनेत प्रवेश केला होता. यंदा शिवसेनेने त्यांना जून्नरमधून उमेदवारी सुद्धा दिली. पण आशा बुचके यांच्या बंडखोरीचा शिवसेनेला फटका बसला व शरद सोनावणे पराभूत झाले. आशा बुचके जिल्हा परिषदेवर निवडून आल्या आहेत. अलीकडेच त्यांनी शिवसेनेला सोडचिठ्ठी दिली. आशा बुचके यांनी अपक्ष निवडणूक लढवत ५० हजारपेक्षा जास्त मते घेतली व शरद सोनावणे यांचा मार्ग बिकट केला. राष्ट्रवादीच्या अतुल बेनके यांना ७४ हजार, शरद सोनावणे यांना ६५ तर आशा बुचके यांना ५० हजार मते मिळाली. बुचके यांच्या बंडखोरीमुळे शरद सोनावणे यांचे दुसऱ्यांदा विधानसभेवर जाण्याचे स्वप्न भंगले.
