विवाह जुळविणाऱ्या संकेतस्थळावर ओळख झाल्यानंतर महिलेला आमिष दाखवून तिच्यावर बलात्कार केल्याप्रकरणी मुंबईतील एकाविरुद्ध कोरेगांव पार्क पोलीस ठाण्यात गुन्हा दाखल करण्यात आला.
हितेंद्र महावीर घोष (वय ४०, रा. रचना मंदिर सोसायटी, सांताक्रुझ, मुंबई) असे गुन्हा दाखल करण्यात आलेल्याचे नाव आहे. महिलेने यासंदर्भात कोरेगांव पार्क पोलीस ठाण्यात फिर्याद दिली आहे. पोलिसांनी दिलेल्या माहितीनुसार, पीडीत महिला अविवाहित आहे. तिचा व्यवसाय आहे. सन २०१४ मध्ये तिची ‘शादी डॉट कॉम’ या संकेतस्थळाच्या माध्यमातून घोष याच्याशी ओळख झाली होती. घोष याने तिला विवाहाचे आमिष दाखविले होते. त्यानंतर घोष पुण्यात आला. त्यांच्या भेटीगाठी वाढल्या. त्यानंतर महिला घोष याच्या मुंबईतील घरी गेली होती. घोष याने तिच्यावर बलात्कार केला.
महिलेने त्याच्याकडे गेल्या महिन्यात विवाहासंदर्भात विचारणा केली. त्या वेळी घोष याने नकार दिला. तिने कोरेगांव पार्क पोलीस ठाण्यात नुकतीच तक्रार दिली. सहायक पोलीस निरीक्षक एन.एन.गायकवाड तपास करत आहेत.