पिंपरी-चिंचवड शहराचे प्रथम नागरिक महापौर राहुल जाधव यांनी पवना धरण पाणलोट क्षेत्रात हवेत गोळीबार केल्याची चर्चा आहे. दरम्यान, याप्रकरणी आपण असे काही केलं नसल्याचे महापौर राहुल जाधव यांनी लोकसत्ता ऑनलाइनशी बोलताना स्पष्ट केले आहे. शहराला पाणीपुरवठा करणाऱ्या पवना धरणावर आज जलपूजनाचा कार्यक्रम होता. त्यामुळे महापौरांसह अनेक कार्यकर्ते त्याठिकाणी उपस्थित होते. यावेळी महापौर राहुल जाधव यांनी सपत्निक जलपूजन केले. त्यानंतर पवना धरण परिसरातील एका हॉटेलमध्ये जेवण करून काही कार्यकर्त्यांसह महापौर बाहेर आले आणि जवळ असलेली नवीन पिस्तूल काढून दाखवत हवेत दोन गोळ्या झाडल्या असल्याची चर्चा आहे. या घटनेनंतर सर्वजण महापौरांच्या दिशेने धावत आले, हे पाहून महापौर गोंधळले असल्याचेही सांगितले जात आहे. काही महिन्यापूर्वीच महापौरांना पिस्तूलाचा परवाना मिळाला असून त्यांनी हवेत गोळीबार केला असल्याची चर्चा आहे. विशेष म्हणजे या घटनेचा एक फोटो व्हारल झाला असून, त्यात महापौरांच्या हातात पिस्तूल दिसत आहे. तर, कार्यकर्ते त्यांच्याकडे पाहत असल्याचेही फोटोत दिसत आहे. जलपूजनाच्या कार्यक्रमाला विरोधी पक्षनेते नाना काटे, मनसेचे गटनेते सचिन चिखले हे देखील उपस्थित होते
