29 November 2020

News Flash

सोळा कोटींच्या थकबाकीमुळे कामत यांचे ऑर्चिड हॉटेल ‘सील’

मिळकत कर थकवलेल्या शहरातील बडय़ा थकबाकीदारांवर महापालिकेने धडक कारवाई सुरू केली

महापालिकेचा मिळकत कर थकवल्यामुळे बालेवाडी येथील हॉटेल ऑर्चिडवर शनिवारी कारवाई करण्यात आली.

मिळकत कर थकवलेल्या शहरातील बडय़ा थकबाकीदारांवर महापालिकेने धडक कारवाई सुरू केली असून या कारवाईत शनिवारी बालेवाडी येथील ऑर्चिड या पंचतारांकित हॉटेलवर कारवाई करण्यात आली. या हॉटेलकडे १६ कोटी २८ लाखांची थकबाकी असल्यामुळे हॉटेल ‘सील’ करण्यात आले. प्रसिद्ध हॉटेल व्यावसायिक विठ्ठल कामत हे या हॉटेलचे संचालक आहेत.

कर आकारणी व कर संकलन कार्यालयामार्फत शनिवारी सहायक कर आकारणी व कर संकलन प्रमुख वैभव कडलख यांच्या नेतृत्वाखाली महापालिकेच्या अधिकाऱ्यांनी ही कारवाई केली. हॉटेल ऑर्चिडकडे मिळकत कराची १६ कोटी ६७ लाख ५६ हजार ४२२ रुपये इतकी थकबाकी आहे. अभय योजनेअंतर्गत हॉटेलला चार कोटी ६० लाख ७६ हजार ६८४ रुपये सवलत देण्यात आली होती. उर्वरित रक्कम संबंधितांनी भरणे बाकी होते. ही थकबाकी २००८ सालापासूनची आहे. दरवर्षी मिळकत कर विभागातर्फे थकित रक्कम वसुलीसाठी प्रयत्न केले जात होते. त्यानुसार हॉटेल व्यवस्थापनाकडून साडेतीन कोटी रुपये जमा करण्यात आले होते. मात्र उर्वरित थकबाकी देण्यास सातत्याने टाळाटाळ केली जात होती. यंदाही वसुलीसाठी हॉटेलला नोटिसा देण्यात आल्या होत्या. मात्र थकबाकी भरण्यास असमर्थता दाखवण्यात आल्यामुळे शनिवारी विशेष पथकाने थकबाकी वसुलीसाठी हे हॉटेल ‘सील’ केले. महापालिकेने प्रसिद्धीस दिलेल्या पत्रकात ही माहिती देण्यात आली आहे.

प्रशासन अधिकारी गिरीष पत्की, विभागीय निरीक्षक दीपक राऊत, श्रीकांत देशपांडे, पेठ निरीक्षक राजेश उपरपेल्ली, राजकुमार टण्णू, गणेश मांजरे, राजू ढाकणे, सचिन शिंदे, मिलिंद चव्हाण, महेश बेंद्रे यांच्या पथकाने ही कारवाई केली.

थकबाकी वसुलीसाठी दोन सहायक कर आकारणी प्रमुख तसेच पाच बँड पथके, २२ विभागीय निरीक्षक, १२५ पेठ निरीक्षक आणि कर्मचाऱ्यांची दहा वसुली पथके तयार करण्यात आली असून त्यांच्यामार्फत वसुलीची कार्यवाही केली जात आहे. ज्या मिळकत करधारकांचा कर थकलेला आहे त्यांनी लवकरात लवकर कर भरून कारवाई टाळावी आणि सहकार्य करावे, असे आवाहन उपायुक्त सुहास मापारी यांनी केले आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on November 6, 2016 2:11 am

Web Title: orchid hotel seal by municipal corporation
Next Stories
1 वस्तीतच अभ्यासाचे हक्काचे ठिकाण
2 ‘मी शेल्फीमय झालो..’
3 खरेदीच्या बहाण्याने दागिने लंपास करणारी टोळी जेरबंद
Just Now!
X