कॅन्टोन्मेंट विभागातील पेट्रोल पंपावरील पेट्रोल व डिझेलवर स्थानिक संस्था कर (एलबीटी) न आकारण्याबाबत पालिकेच्या वतीने पेट्रोलियम कंपन्यांना पत्र देण्यात आल्याने या विभागांत पेट्रोल व डिझेल स्वस्त होण्याचा मार्ग मोकळा झाला आहे. एलबीटी हटविल्यास कॅन्टोन्मेंटमध्ये पेट्रोल सुमारे दोन रुपयांनी, तर डिझेल दीड रुपयांनी स्वस्त होऊ शकणार आहे.
पुणे पेट्रोल डिलर असोसिएशनचे प्रवक्ते व लष्कर विभागातील पेट्रोल पंपधारक अली दारुवाला यांनी याबाबतची माहिती दिली. कॅन्टोन्मेंट विभागात एलबीटी नसल्याने पेट्रोल व डिझेलवर एलबीटी न लावण्याबाबत दारुवाला यांनी सर्वात प्रथम मागणी नोंदविली होती. या मागणीबाबत त्यांनी सातत्याने पाठपुरावा केला.
दारुवाला यांनी दिलेल्या माहितीनुसार, कॅन्टोन्मेंट विभागात पेट्रोल व डिझेलवर एलबीटी न घेण्याबाबत पालिकेच्या स्थानिक संस्था कर विभागाचे प्रमुख विलास कानडे यांनी तिन्ही पेट्रोलियम कंपन्यांना पत्र दिले आहे. या निर्णयाची अंमलबजावणी झाल्यानंतर कॅन्टोन्मेंट विभागात पेट्रोल व डिझेलचे दर कमी होतील. पुणे कॅन्टोन्मेंटमध्येच नव्हे, तर या निर्णयाचा फायदा खडकी व देहूरोड कॅन्टोन्मेंट विभागातील नागरिकांनाही होणार आहे.