पिंपरी-चिंचवड शहरात लॉकडाउनमध्येही विनाकारण फिरणाऱ्या नागरिकांची पोलीस थेट करोना टेस्ट करत असून, अनेकजण पॉजिटिव्ह आढळून आल्याने, पोलिसांकडून त्यांच्या हातवार होम क्वारंटाईनचा शिक्का मारला जात आहे. तर, ज्यांना प्रादुर्भाव जास्त आहे त्यांना रुग्णालयात भरती केली जात आहे. अशी माहिती सहाय्यक पोलीस आयुक्त सागर कवडे यांनी दिली आहे. पिंपरी-चिंचवड शहरात करोनाबाधित रुग्णांची संख्या दिवसेंदिवस वाढत आहे. ब्रेक द चेन या मोहिमेतंर्गत नियम कडक करण्यात आले असून विनाकारण फिरणाऱ्या नागरिकांची करोना टेस्ट केली जात आहे. गंभीर बाब म्हणजे यात अनेकजण पॉझिटिव्ह आढळत आहेत. नागरिकांना त्याच्या आसपास फिरणाऱ्या व्यक्तींपासून करोनाचा धोका असू शकतो, असं सहाय्यक पोलीस आयुक्त सागर कवडे यांनी म्हटलं आहे. त्यामुळं प्रत्येक नागरिकाने सोशल डिस्टसिंग आणि मास्क वापरून करोनापासून स्वतःचा बचाव केला पाहिजे असं देखील त्यांनी म्हटलं आहे. नागरिकांनी विनाकारण घराबाहेर पडू नये आणि नियमांचं पालन करावे असे आवाहन त्यांनी नागरिकांना केले आहे. यावेळी वरिष्ठ पोलीस निरीक्षक शंकर अवताडे हे देखील उपस्थित होते.
