पिंपरी-चिंचवड पोलीस आयुक्तालयातील एका पोलीस ठाण्याच्या चौकीत चक्क संशयित आरोपीच करोना पॉझिटिव्ह निघाला असून, यामुळे पाच पोलीस कर्मचाऱ्यांवर क्वारंटाइन होण्याची वेळ आली आहे. आधीच पोलीस आयुक्तालयातील ७ जण हे करोनाबाधित आढळलेले आहेत. यापैकी, एका अधिकाऱ्याला डिस्चार्ज देण्यात आलेला आहे. पिंपरी-चिंचवड पोलीस आयुक्तालयात एका पोलीस अधिकाऱ्यांमुळे चार जणांना करोनाची बाधा झाली होती. त्यानंतर सर्व जणांना रुग्णालयात दाखल करण्यात आलेले आहे. दरम्यान, दोन भावंडाचा घरगुती वाद पोलीस चौकीपर्यंत पोहचला. तेव्हा एकाची अदखलपात्र तक्रार घेण्यात आली तर दुसऱ्याला नोटीस बजावत समजूत काढून घरी पाठवून देण्यात आले. यापैकी, एकाला सर्दी आणि खोकला झाल्याने, तो औंध येथील जिल्हा रुग्णालयात गेला असता त्याला करोनाचीबाधा झाल्याचं समोर आलं. ही माहिती समजताच या संबंधित पोलीस चौकीतील ५ जण क्वारंटाइन झाले आहेत.
