पिंपरीमध्ये आयपीएलच्या सामन्यांवर सट्टा लावणाऱ्या दोघांना पोलिसांनी अटक केली आहे. या दोघांकडून पोलिसांनी २४ लाख २७ हजारांचा मुद्देमाल जप्त केला आहे. लालचंद शर्मा आणि जयरामदास फोटयानी अशी या आरोपींची नावं आहेत. दोन्ही आरोपी चारचाकी गाडीतून फिरत सट्टा स्विकारत होते अशी माहिती पोलिसांनी दिली. पिंपरी पोलीस ठाण्याच्या हद्दीत दोन व्यक्ती आयपीएल सामन्यांवर बेटींग करत असल्याची माहिती पोलिसांना मिळाली होती. मिळालेल्या माहितीनुसार पावलं उचलत वरिष्ठ पोलीस निरीक्षक मिलिंद वाघमारे यांच्या पथकाने घटनास्थळी छापा मारला. या कारवाईत पोलिसांनी ४ मोबाईल, १ वही, पेन, ५ हजार रुपये रोख आणि इनोव्हा गाडी असा मुद्देमाल जप्त केला आहे. दोन्ही आरोपींविरोधात महाराष्ट्र जुगार प्रतिबंधक अधिनीयम कलम १२ (अ) प्रमाणे गुन्हा दाखल करण्यात आला आहे.
