सोन्याचा मोह कुणाला नाही होतं. त्यामुळे अनेकजण अंगावर सोनं घालून लोकांचं लक्ष वेधून घेतात. त्याच्या अनेक गोष्टीही तुम्ही ऐकल्या असतील.. पण, ही गोष्ट वेगळी आहे. इथे गड्यानं लोकांच्या दाढ्या करण्यासाठी ८ तोळ्याच्या सोन्याचा वस्तरा बनवून घेतला आहे. त्यामुळे आळंदीतील अविनाश बोरूदिया यांच्या नावाची गावासह पिंपरी-चिंचवड परिसरात चर्चा होतेय. ते शंभर रुपयात सोन्याच्या वस्तऱ्याने दाढी करून देतात. कुतूहलापोटी पुणे, पिंपरी-चिंचवड शहरासह ग्रामीण भागातून हा सोन्याचा वस्तरा पाहण्यासाठी आणि दाढी करण्यासाठी नागरिकांची गर्दी वाढली आहे. अविनाश बोरूदिया हे मूळ व्यवसायिक असून, त्यांनी युवराज कोळेकर आणि विक्की वाघमारे या दोन तरुणांना सोबत घेऊन रुबाब नावाचे सलूनचे दुकान सुरू केले. दरम्यान, दुकानाच्या नावाप्रमाणेच काहीतरी हटके करण्याची कल्पना अविनाश यांच्या डोक्यात होती. त्यानुसार, भारतीय संस्कृतीत महत्वाचं स्थान असलेल्या सोन्याच्या धातूची निवड त्यांनी केली. त्यांनी राजस्थान येथील कारागिरांकडून ८ तोळे सोन्याचा वस्तरा बनवून घेतला. ज्याची किंमत तब्बल ४ लाख इतकी आहे. 'रुबाब'चे मोठ्या थाटात उदघाटन करण्यात आले आणि अवघ्या शंभर रुपयांमध्ये सोन्याच्या वस्तऱ्याने ग्राहकांची दाढी करून द्यायला लागले. बघता बघता, अवघ्या आळंदीसह पंचक्रोशीत सोन्याच्या वस्तऱ्याची चर्चा सुरू झाली. जो तो कुतूहलाने याकडे पहात असून, या महागाईच्या काळात देखील सोन्याच्या वस्तऱ्याने दाढी करून मिळत असल्याने ग्राहक गर्दी करताना दिसत आहेत. भविष्यात रुबाब सलूनमध्ये सोन्याची कात्री करण्याचा मानस असल्याचं अविनाश यांनी सांगितलं. त्यामुळे काही दिवसांनी कटिंग देखील सोन्याच्या कात्रीने होईल यात काही शंका नाही.!