News Flash

तुकाराम मुंढेच्या नियुक्तीनंतर पुण्यात जल्लोष; ‘पीएमपीएमएल’ कामगार संघटनांनी फोडले फटाके

पुणेकरांच्या अपेक्षा वाढल्या

पुणे परिवहन मंडळाच्या अध्यक्षपदी तुकाराम मुंढे यांची नियुक्ती झाल्याने कामगार संघटनेच्या सदस्यांनी फटाके फोडून आनंद व्यक्त केला.

नवी मुंबई महापालिकेचे तत्कालीन आयुक्त तुकाराम मुंढे यांची राज्य सरकारने शनिवारी पुणे महानगर परिवहन महामंडळाच्या व्यवस्थापकीय संचालक आणि अध्यक्षपदी (पीएमपीएमएल) नियुक्ती केली आहे. त्यांच्या नियुक्तीनंतर पुणे शहरातील विविध स्वयंसेवी संस्था आणि पीएमपीएमएलच्या कामगार संघटनांनी आनंद व्यक्त केला आहे. फटाके फोडून त्यांच्या नियुक्तीचे स्वागत करण्यात आले.

राज्य सरकारने तुकाराम मुंढे यांची ‘पीएमपीएमएल’साठी पूर्णवेळ अधिकारी दिल्याने गतवैभव प्राप्त होईल. त्याचबरोबर शहरातील सार्वजनिक वाहतूक अधिक सक्षम होण्यास मदत होईल. मुंढे यांनी येत्या काळात कामगारांचे आणि प्रवाशांच्या समस्या सोडवाव्यात, अशी अपेक्षा महाराष्ट्र कामगार मंचाचे अध्यक्ष दिलीप मोहिते यांनी व्यक्त केली. पुणे शहरातील सर्वाजनिक वाहतूक सक्षम करण्यासाठी महापालिकेतील सत्ताधारी आणि विविध स्वयंसेवी संस्थाकडून पीएमपीएमएलसाठी पूर्णवेळ अधिकारी द्यावा, अशी अनेक वर्षांपासूनची मागणी होती. दीड वर्षांपूर्वी या पदावर श्रीकर परदेशी यांची नियुक्ती करण्यात आली होती. त्यांनी या पदाचा कार्यभार स्वीकारताच पीएमपीएमएलला नवसंजीवनी देण्याचे काम केले. मात्र त्याचदरम्यान त्यांना बढती देऊन पंतप्रधान कार्यालयात उपसचिवपदावर नियुक्ती करण्यात आली. त्यांच्यानंतर आता कोण येणार, असा प्रश्न निर्माण झाला होता. त्यावेळी राज्य सरकारने अभिषेक कृष्णा यांची नियुक्ती केली. मात्र ते काही काळापुरतेच या पदावर राहिले. त्यांची नाशिक महापालिका आयुक्तपदी नियुक्ती करण्यात आली. त्यांच्यानंतर तब्बल आठ महिने उलटूनही कोणत्याही अधिकाऱ्याची नियुक्ती करण्यात आली नव्हती. या कालावधीत अनेक वेळा राज्य सरकारकडे शहरातील लोकप्रतिनिधी, स्वयंसेवी संस्थांनी पूर्णवेळ अधिकारी द्यावा, अशी मागणी केली होती. या सर्वांच्या मागणीला आज अखेर यश आले असून आता तुकाराम मुंढे यांची नियुक्ती करण्यात आली आहे. नवी मुंबई महापालिकेच्या आयुक्तपदाच्या कार्यकाळात त्यांनी पारदर्शक कारभार करून नागरिकांची मने जिंकली होती. आता ते पुणे शहराच्या परिवहन सेवेला रुळावर आणतात का, याकडे सर्वांचे लक्ष लागले आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on March 25, 2017 8:15 pm

Web Title: pune pmpml new chief tukaram mundhe welcome pune
Next Stories
1 तुकाराम मुंढेंची पुणे परिवहन मंडळाच्या अध्यक्षपदी नियुक्ती
2 ‘ईव्हीएम’मध्ये घोटाळ्याचा आरोप; पुणे जिल्हाधिकारी कार्यालयावर धडकला मोर्चा
3 पुण्याच्या आयुक्तांना कचरावेचक महिलांकडून जुन्या शर्टांची भेट
Just Now!
X