पुण्यातील शिवाजीनगर भागात एका लॅब मार्फत करोनाचा बनावट रिपोर्ट देणार्‍या दोघांना अटक करण्यात डेक्कन पोलिसांना यश आले आहे. आजवर अनेक नागरिकांना बनावट रिपोर्ट दिल्याची कबुली आरोपींनी दिली आहे. सागर अशोक हांडे (वय 25 रा. संगम चौक, मु.नांदेड) दयानंद भिमराव खराटे (वय 21 रा. वारजे माळवाडी) अशी आरोपींची नावं आहेत. पोलिसांनी दिलेल्या माहितीनुसार, जंगली महाराज रोडवर असलेल्या एका लॅबमध्ये बनावट करोना तपासणीचे रिपोर्ट दिले जात आहे, अशी माहिती एका व्यक्ती मार्फत मिळाली होती. त्यानुसार तेथील लॅब मधील सागर अशोक हांडे आणि दयानंद भिमराव खराटे या दोघांना ताब्यात घेण्यात आलं व चौकशी केली असता, त्या आजवर अनेकांना बनावट रिपोर्ट दिल्याची दोघांनी कबुली दिली. तसेच आणखी या प्रकरणात हे दोघे सहभागी असण्याची शक्यता व्यक्त करण्यात आली आहे. त्यामुळे या दोघांची अधिक चौकशी सुरू असल्याचे डेक्कन पोलीसांकडून सांगण्यात आले आहे.
