पुण्यातील हडपसर येथील गंगानगरमध्ये झालेल्या गोळीबारात एका वृद्धाचा मृत्यू झाल्याची घटना घडली आहे. या प्रकरणाचा तपास हडपसर पोलीस करीत आहेत. पंचय्या सिद्धय्या स्वामी असे वयोवृद्ध मयताचे नाव आहे. पोलिसानी दिलेल्या माहितीनुसार, गंगानगर येथील गल्ली क्रमांक 10 येथून आज सायंकाळच्या सुमारास फूटपाथ वरून पंचय्या सिध्दय्या स्वामी हे जात होते. तेव्हा तेथून काही अंतरावर मयूर गुंजाळ आणि तेजाब कल्याणी यांच्यात काही जुन्या गोष्टींमधून वाद झाला. त्यावेळी तेजाब याने मयूरच्या दिशेने गोळी झाडली. परंतु ती गोळी फुटपाथवरून चालले स्वामी यांच्या मांडीला लागली. त्यानंतर स्वमी हे खाली कोसळले. दरम्यान, ही घटना पाहताच परिसरातील नागरिकांनी स्वामी यांना तातडीने जवळील रूग्णालयात दाखल केले. परंतु उपचारादरम्यान त्यांचा मृत्यू झाला. तसेच नेमके काय घडले याबाबतचा तपास सुरू असून गुन्हा दाखल करण्याचे काम सुरू असल्याचे सांगण्यात आले.
