घरात खेळताना मसाल्यात पाणी पडल्यामुळे एका महिलेने तिच्या पाच वर्षांच्या मुलीला चटके दिल्याची धक्कादायक घटना समोर आली आहे. या प्रकरणी महिलेविरोधात हडपसर पोलीस ठाण्यात गुन्हा दाखल करण्यात आला आहे. हडपसरमधील गोंधळेनगर येथे राहणारे रजनीश तिवारी यांच्या शेजारी पाच वर्षांची मुलगी राहते. शुक्रवारी लहान मुलगी नेहमीप्रमाणे त्यांच्या घरात गेली. त्या मुलीच्या अंगावर मारहाणीचे व्रण दिसले. त्यांनी मुलीला विचारणा केली असता मुलीने आईने चटके दिल्याचे सांगितले. मी खेळत असताना माझ्यामुळे मसाल्यात पाणी पडले, यामुळे आईने चटके दिले, असे तिने सांगितले. रजनीश तिवारी यांनी पोलीस ठाण्यात संबंधित महिलेविरोधात तक्रार दाखल केली. पोलिसांनी महिलेविरोधात गुन्हा दाखल करत तपासाला सुरुवात केली आहे.
