पिंपरी येथे वडिलांनीच आपल्या १३ वर्षाच्या मुलीवर तब्बल सहा वर्षे बलात्कार केल्याची घटना उघडकीस आली आहे. या प्रकरणी संशयित आरोपीविरोधात वाकड पोलिसांत तक्रार दाखल झाली असून अजून त्याला ताब्यात घेतलेले नाही. या घटनेमुळे परिसरात खळबळ उडाली आहे. पोलिसांनी दिलेल्या माहितीनुसार, पिंपरी येथील काळेवाडी परिसरात पीडित मुलगी आपले वडील व सावत्र आईबरोबर राहते. गेल्या सहा वर्षांपासून वडील वारंवार तिच्यावर बलात्कार करत होते. याबाबत तिने आपल्या सावत्र आईला सांगितले. परंतु हा प्रकार रोखण्याचे सोडून सावत्र आईने काही होत नाही, याकडे दुर्लक्ष कर असा सल्ला दिला. वाकड पोलिसांत याप्रकरणी तक्रार दाखल करण्यात आली आहे. पोलीस पुढील तपास करत आहेत. पीडित मुलगी ही गर्भवती असल्याचे समजल्याने सावत्र आईने तिला घराच्या बाहेर काढले होते. त्यामुळेच या संतापजनक प्रकाराला वाचा फुटली असून पीडित मुलीने स्वतःच पोलिसांकडे तक्रार दाखल केली.