पुणे-नाशिक रस्त्यावर मोशी येथे हमरस्त्यावर असलेल्या सराफाच्या दुकानावर गुरुवारी पहाटे अज्ञात चोरटय़ांनी दरोडा टाकला असून साडेनऊ किलो चांदीसह रोख ऐवज घेऊन पोबारा केला आहे. मोशी येथे नुकतीच यात्रा झाली व लगेचच झालेल्या या प्रकारामुळे खळबळ उडाली आहे.मोशी येथे महामार्गावर ‘न्यू ओमकार ज्वेलर्स’ हे दुकान आहे. तेथे गुरुवारी पहाटेच्या सुमारास दरोडा पडला. भिंतींना भगदाड पाडून चोरटय़ांनी आत प्रवेश केला व तिजोरी उघडून ८ किलो चांदी तसेच रोख रक्कम लुटून नेली. दुकानाचे मालक प्रशांत दहिवळ यांना सकाळी हा प्रकार लक्षात आला. त्यांनी याबाबतची माहिती पोलिसांना दिली. तेव्हा पोलीस निरीक्षक राजेंद्र कुंटे व पथक घटनास्थळी आले. त्यांनी दुकानाची व संपूर्ण परिसराची तपासणी केली. दुकानाच्या आजूबाजूला अवजड वाहने उभी राहतात. त्यामुळे दुकान पूर्णपणे झाकोळून जाते. या ठिकाणी लावण्यात आलेले सीसीटीव्ही व धोक्याची घंटा असलेली यंत्रणा गेल्या काही दिवसांपासून बंद अवस्थेत होती, असे पोलिसांच्या निदर्शनास आले. पुढील तपास पोलीस निरीक्षक कुंटे करत आहेत.
