कोथरूडच्या पौड रस्ता भागातील लष्कराच्या एका अधिकाऱ्याचा घरातून चोरटय़ांनी दोन पदकांसह चार लाख दहा हजार रुपये किमतीचा ऐवज चोरून नेला.सदाशिव वामन चितळे (रा. मंगल बंगला, अनंत कृपा हाउसिंग सोसायटी, पौड रस्ता, कोथरूड) यांनी या प्रकरणी फिर्याद दिली आहे. चितळे यांचा मुलगा लष्करामध्ये आहे. शनिवारी सकाळी सात ते बुधवारी सकाळी सहाच्या सुमारास चितळे बाहेरगावी गेल्याने त्यांचा बंगला बंद होता. या दरम्यान अज्ञात चोरटय़ांनी बंगल्याच्या दरवाजाचा कडी-कोयंडा तोडला. लोखंडी कपाटातील तिजोरीही चोरटय़ांनी उचकटली. तिजोरीतील १५५ ग्रॅम वजनाचे सोन्याचे दागिने व पाच किलो वजनाच्या चांदीच्या वस्तू तसेच काही रोख रक्कम चोरटय़ांनी पळविली. चितळे यांच्या मुलाला लष्करात मिळालेली दोन पदकेही या चोरटय़ांनी पळवून नेली. या प्रकरणी कोथरूड पोलिसांकडून तपास करण्यात येत आहे.
