पुण्यामध्ये हडपसर येथील वैदूवाडी येथे एका पाच वर्षीय चिमुरडीवर लैंगिक अत्याचार झाल्याची घटना समोर आली आहे. या मुलीच्या घराच्या परिसरात राहणाऱ्या एका ४० वर्षांच्या नराधमाने हे अमानुष कृत्य केले आहे. हडपसर पोलिसांनी आरोपीला अटक केली आहे. पोलिसांच्या माहितीनुसार, गजानन लक्ष्मण चाकवते (वय ४०, रा. नवीन म्हाडा कॉलनी, बिल्डिंग नंबर ३, वैदूवाडी) असे आरोपीचे नाव आहे. हडपसरच्या वैदूवाडीतील म्हाडा कॉलनीमध्ये काल सायंकाळी पाच वाजण्याच्या सुमारास आरोपी गजानन चाकवतेने चिमुरडीला खाऊचे आमिष दाखवून तिच्यावर लैंगिक अत्याचार केले. अत्याचारानंतर तुमची मुलगी जिन्यावरुन पडल्याने जखमी झाल्याचे तिच्या आई-वडिलांना आरोपीने सांगितले. त्यामुळे पीडित मुलीच्या आई-वडिलांनी तिला तत्काळ जवळील रुग्णालयात दाखल केले, त्यानंतर तिच्यावर लैंगिक अत्याचार झाल्याची बाब उघडकीस आली. पुढील उपचारांसाठी या चिमुरडीला ससून रुग्णालयात दाखल करण्यात आले आहे.
