पुण्यातील फर्ग्युसन महाविद्यालयाला विद्यापीठाचा दर्जा देण्यात आला आहे. आज झालेल्या राज्य मंत्रिमंडळाच्या बैठकीत हा निर्णय घेण्यात आला. या निर्णयामुळे आता महाराष्ट्र राज्य फर्ग्युसन विद्यापीठ अशी या महाविद्यालयाची ओळख असणार आहे. ही माहिती फर्ग्युसन महाविद्यालयाचे प्रभारी प्राचार्य नितीन कुलकर्णी यांनी दिली. राज्यमंत्री मंडळाच्या निर्णया बाबत नितीन कुलकर्णी म्हणाले की, फर्ग्युसन महाविद्यालयाची स्थापना 1885 साली लोकमान्य टिळक, थोर समाजसुधारक आगरकर यांच्या पुढाकाराने झाली होती. या संपूर्ण कालावधीत अनेक नामवंत व्यक्ती महाविद्यालयामधून पुढे गेले आहेत. फर्ग्युसन महाविद्यालयास स्वायत्तता दर्जा 2016 या वर्षी मिळाला होता. राष्ट्रीय उच्चतर शिक्षा अभियाना अंतर्गत 2018 वर्षी प्रस्ताव मागविण्यास एचआरडी विभागाकडून सुरवात करण्यात आली. तर देशभरातील 10 महाविद्यालयाचा सरकारकडे विद्यापीठाचा दर्जा मिळविण्यासाठी प्रस्ताव आला होता. त्यामध्ये फर्ग्युसन पाहिले आले असल्याचे त्यांनी सांगितले. ते पुढे म्हणाले की, फर्ग्युसनमहाविद्यालयामधील विद्यार्थ्यांना पुढील वर्षीपासून महाराष्ट्र राज्य फर्ग्युसन विद्यापीठ या नावाने गुणपत्रिका मिळणार आहे. फर्ग्युसन महाविद्यालयास स्वतंत्र विद्यापीठाचा दर्जा मिळाला असल्याने आनंदी असल्याची भावना त्यांनी व्यक्त केली.
