पुण्यातील बाजीराव रोडवरील नातूबाग मित्र मंडळाच्या गणपती मंदिरातील दानपेटी चोरीला गेल्याची घटना घडली आहे. यामुळे शहरात एकच खळबळ उडाली आहे. याप्रकऱणी पोलीस ठाण्यात तक्रार दाखल करण्यात आली असून खडक पोलीस स्टेशन तपास करत आहे. या चोरीचं सीसीटीव्हीदेखील समोर आलं आहे. पोलिसांनी दिलेल्या माहितीनुसार, बाजीराव रोडवरील नातूबाग मित्र मंडळाचे गणपती मंदिर आहे. मंगळवारी मध्यरात्रीच्या सुमारास दोन चोर दुचाकीवरुन आले. यानंतर काही वेळातच त्यांनी मंदिरातील दानपेटी चोरून नेली. सकाळी दर्शनासाठी आलेल्या नागरिकांनी मंडळाच्या पदाधिकाऱ्यांना सांगितल्यानंतर ही घटना उघडकीस आली. ही चोरी सीसीटीव्हीत कैद झाली असून त्याआधारे तपास केला जात आहे. दानपेटीत साधारणपणे दहा हजार रुपये होते अशी माहिती देण्यात आली आहे.
