लोकसत्ता प्रतिनिधी
पुणे : ब्रिटीश गायक ॲलन वॉकर यांच्या संगीत रजनीत (लाइव्ह कॉन्सर्ट) चोरट्यांनी धुमाकूळ घातला. खराडीतील एका मैदानावर आयोजित करण्यात आलेल्या रजनीत चोरट्यांनी प्रेक्षकांकडील ३६ मोबाइल संच चोरून नेले. चंदननगर पोलिसांनी मुंबई, हैद्राबादमधील चोरट्यांच्या टोळीला अटक केली.
सय्यद महंमद इद्रीस शेख (वय २१, रा. मुंबई), अखिल व्यंकटरमना गोदावरी (वय २४ रा. हैद्राबाद) , लोकेश हनुमंत पुजारी (वय ३१, रा. मुंबई), पप्पु भागीरथी वैश्य (वय २४ रा. मुंबई) अशी अटक करण्यात आलेल्यांची नावे आहेत. पोलिसांनी दिलेल्या माहितीनुसार, खराडीतील न्यू इंग्लिश फिनेक्स स्कुलच्या मैदानावर १८ ऑक्टोबर रोजी ब्रिटीश गायक अॅलन वॉकर लाईव्ह कॉन्सर्टचे आयोजन करण्यात आले होते. संगीत रजनीसाठी होणारी गर्दी विचारात घेऊन पोलिसांनीबंदोबस्त तैनात केला होता.
आणखी वाचा-पुणे: फर्ग्युसन रस्ता परिसरातील बंगल्यात चंदन चोरी, बंगला मालकाला दगड भिरकावून मारण्याची धमकी
शेख, गोदावरी, पुजारी, वैश्य यांनी गर्दीत प्रेक्षकांकडील मोबाइल संच चोरले. गर्दीत मोबाइल चोरीच्या तक्रारी पोलिसांकडे आल्यानंतर पोलिसांनी तातडीने तपास सुरु केला. संशय आल्याने पोलिसांनी चौघांना ताब्यात घेतले. पोलिसांनी त्यांची चौकशी केली. त्यांच्याकडून १४ मोबाइल संच जप्त करण्यात आले. याप्रकरणी त्यांच्याबरोबर असलेल्या दोन ते तीन साथीदारांचा शोध घेण्यात येत आहे, अशी माहिती चंदननगर पोलीस ठाण्याचे वरिष्ठ पोलीस निरीक्षक संजय चव्हाण यांनी दिली.
