लोकसत्ता प्रतिनिधी
पुणे : लष्करी रुग्णालयात नोकरीच्या आमिषाने ४९ लाख रुपयांची फसवणूक करण्यात आल्याचा प्रकार उघडकीस आला. याप्रकरणी सहकारनगर पोलिसांनी एकाविरुद्ध गुन्हा दाखल केला.
विनायक तुकाराम कडाळे (वय ५३, रा. गंगाधाम फेज दोन, मार्केट यार्ड) असे गुन्हा दाखल केलेल्याचे नाव आहे. याबाबत राजेंद्र काशीनाथ हगवणे (वय ५३, रा. शिवाजी कॉम्प्लेक्स, धनकवडी) यांनी सहकारनगर पोलीस ठाण्यात फिर्याद दिली आहे. हगवणे यांची एका परिचितामार्फत कडाळेशी ओळख झाली होती. वानवडीतील लष्करी रुग्णालयात विविध पदांवर भरती करण्यात येणार आहे. लष्करातील वरिष्ठ अधिकाऱ्यांशी माझी ओळख आहे. नोकरी लावायची असल्यास मला सांगा, अशी बतावणी कडाळेने हगवणे यांच्याकडे केली होती.
हगवणे यांची मुलगी आणि नात्यातील काहीजणांना नोकरी लावण्याचे आमिष दाखवून कडाळेने पैसे मागितले. त्यांनी कडाळेच्या बँक खात्यात ३० लाख ६० हजार रुपये जमा केले. कडाळेने नोकरीच्या आमिषाने आणखी काहीजणांकडून १८ लाख ७५ हजार रुपये घेतले. चार वर्षांपासून कडाळेकडे हगवणे आणि तक्रारदार पाठपुरावा करत होते. नोकरी न मिळाल्याने अखेर हगवणे यांनी पोलिसांकडे तक्रार दिली. कडाळेविरुद्ध यापूर्वी फसवणुकीचे गुन्हे दाखल झाले आहेत. सहायक पोलीस निरीक्षक पवार तपास करत आहेत.
