लटकणारा मांजा एका चिमुकल्याच्या डोळ्यात घुसल्याने त्याच्या दोन्ही डोळ्यांना गंभीर इजा झाली आहे. पिंपरीतील काळेवाडी भागात ही घटना घडली आहे. पतंगाचा मांजा लटकत होता त्याचवेळी नातेवाईकासोबत दुचाकीवर बसून हा चिमुकला घरी निघाला होता. संध्याकाळी साडेपाचच्या सुमारास लटकणारा मांजा या मुलाच्या डोळ्यात घुसला आणि तो खाली पडला. हा मांजा या मुलाला आणि त्याच्या नातेवाईकाला दिसला नसल्याने हा अपघात घडला. या अपघातात चिमुकल्याच्या डोळ्यांना गंभीर इजा झाली आहे. या घटनेची माहिती मिळताच पोलीस घटनास्थळी दाखल झाले. जखमी लहान मुलाला खासगी रूग्णालयात दाखल करण्यात आले असून त्याच्यावर उपचार सुरु आहेत. या प्रकरणात पोलिसांनी तक्रार दाखल केली नसल्याने जखमी मुलाचे नाव अद्याप समजू शकलेले नाही. मागील वर्षी म्हणजेच २५ जानेवारी २०१७ रोजी थेरगाव येथे पतंग उडवताना मांजा विद्युत तारांमध्ये अडकल्याने झटका बसून ५ वर्षाचा मुलगा गंभीर जखमी झाला होता.ही घटना थेरगाव मधील पडवळनगर येथे घडली होती.
