लोकसत्ता प्रतिनिधी पुणे : महिलेला प्रेमाच्या जाळ्यात ओढून तिची सदनिका बळकाविण्याचा प्रयत्न करणाऱ्या एकाविरुद्ध वानवडी पोलिसांनी गुन्हा दाखल केला.याप्रकरणी नागनाथ गुलाब शिंदे (वय ५४, रा. वानवडी) याच्याविरुद्ध गुन्हा दाखल करण्यात आला आहे. याबाबत एका ४० वर्षीय महिलेने वानवडी पाेलीस ठाण्यात फिर्याद दिली आहे. पोलिसांनी दिलेल्या माहितीनुसार, आरोपी शिंदे याचा विवाह झाला असून, त्याला दोन मुले आहेत. तक्रारदार महिलेशी शिंदेची ओळख झाली. त्याने महिलेला प्रेमाच्या जाळ्यात ओढले. त्यानंतर तो वानवडीतील महिलेच्या सदनिकेत राहू लागला. त्याने महिलेला विवाहाचे आमिष दाखविले. त्यानंतर त्याने महिलेशी आळंदी नोंदणी पद्धतीने विवाह केला. विवाहानंतर सुरुवातीला शिंदे चांगला वागला. त्याने महिलेकडे पैशांची मागणी सुरू केली. महिलेने वाघोलीतील आईच्या नावावर असलेली जमीन विक्री करण्याचा प्रयत्न केला. जमीन व्यवहारातील पहिला हप्त्यापोटी मिळालेले दीड लाख रुपये तिने शिंदेला दिले. त्यानंतर त्याने महिलेच्या नावावर असलेली सदनिका बळाकाविण्याचा प्रयत्न केला. सदनिकेची विक्री करून त्याने पैशांची मागणी केली. महिलेचा शारिरिक आणि मानसिक छळ केला. त्याचा छळ असह्य झाल्याने महिलेने पोलिसांकडे तक्रार दिली. चौकशीत शिंदे विवाहित असताना त्याने ही बाब महिलेपासून लपविल्याचे उघड झाले. पोलीस उपनिरीक्षक अजय केसरकर तपास करत आहेत.
