कसबा पेठेत दहशत माजविणाऱ्या गुंडाच्या विरोधात पोलीस आयुक्त अमिताभ गुप्ता यांनी झोपडपट्टी दादा प्रतिबंधक कायद्यान्वये (एमपीडीए) कारवाई करण्याचे आदेश दिले. गुंडाला वर्षभरासाठी कोल्हापुरातील कारागृहात स्थानबद्ध करण्यात येणार आहे. संकेत उर्फ भूषण आनंद तारु (वय २२, रा. भोईराज भवनजवळ, १११७ कसबा पेठ) असे कारवाई केलेल्या गुंडाचे नाव आहे. हेही वाचा- पुणे: एसटी प्रवासी महिलेचे दागिने चोरीस संकेत विरोधात खुनाचा प्रयत्न, दहशत माजविणे, पिस्तुल बाळगणे असे गंभीर स्वरुपाचे गुन्हे दाखल आहेत. त्याच्या विराेेधात कारवाई करण्याचा प्रस्ताव फरासखाना पोलीस ठाण्याचे वरिष्ठ पोलीस निरीक्षक शब्बीर सय्यद आणि गुन्हे प्रतिबंधक शाखेच्या वरिष्ठ पोलीस निरीक्षक वैशाली चांदगुडे यांनी तयार केला होता. या प्रस्तावास पोलीस आयुक्त गुप्ता यांनी मंजुरी देऊन त्याला वर्षभरासाठी कोल्हापुरातील कारागृहात स्थानबद्ध करण्याचे आदेश दिले. पोलीस आयुक्तांच्या आदेशानुसार आतापर्यंत शहरातील ८९ गुंडांच्या विरोधात झोपडपट्टी दादा प्रतिबंधक कायद्यान्वये कारवाई करण्यात आली आहे.
