उद्योजक गणेश आणि नानासाहेब गायकवाड या पिता पुत्रांच्या टोळीवर पिंपरी-चिंचवड पोलिसांनी ‘मोक्का’अंतर्गत कारवाई केली आहे. त्यांच्यावर पिंपरी-चिंचवड पोलीस आयुक्तालयात एकूण १४ गंभीर गुन्हे दाखल आहेत. या पिता-पुत्रांच्या टोळीत एकूण सहा सदस्य आहेत, असे पोलिसांकडून सांगण्यात आलं आहे. गणेश गायकवाड हा टोळीचा प्रमुख असून त्याच्यासह संदीप गोविंद गायकवाड, सचिन गोविंद गायकवाड, राजू दादा अंकुश, नानासाहेब शंकर गायकवाड आणि चंद्रकांत बाबासाहेब नाणेकर यांचा टोळीत सहभाग आहे. या सर्वांवर महाराष्ट्र संघटित गुन्हेगारी नियंत्रण अधिनियम सन १९९९ नुसार कारवाई करण्यात आली आहे. गणेश उर्फ केदार आणि नानासाहेब शंकर गायकवाड या दोघांसह एकूण सहा जणांवर पिंपरी-चिंचवड पोलिसात १४ गंभीर गुन्हे दाखल आहेत. त्यात, खुनाचा प्रयत्न, अपहरण करून मारहाण, बनावट कागदपत्रांद्वारे फसवणूक, खंडणीसाठी मारहाण, अनैसर्गिक शारिरीक संबंध ठेवून खुनाचा प्रयत्न, दरोडा घालणे अशा गुन्ह्यांचा समावेश आहे. पिंपरी-चिंचवड पोलीस आयुक्तालयातील वेगवेगळ्या पोलीस ठाण्यात हे गुन्हे दाखल आहेत.
