बिबवेवाडीत भिंत कोसळून बांधकाम मजुराचा मृत्यू; ठेकेदाराविरुद्ध गुन्हा

मिथुन नारायण चव्हाण (वय ३४, रा. महावीरनगर, सुखसागरनगर, कात्रज) असे मृत्युमुखी पडलेल्या बांधकाम मजुराचे नाव आहे. या प्रकरणी ठेकेदाराविरुद्ध गुन्हा दाखल करण्यात आला आहे. याबाबत चव्हाण यांची पत्नी श्रीदेवी (वय २१, मूळ रा. किनीमोड तांडा, ता. अक्कलकोट, जि. सोलापूर) हिने बिबवेवाडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, बिबवेवाडीतील अप्पर इंदिरानगर परिसरात एका घराचे बांधकाम सुरू होते. हे काम ठेकेदार राठोड याला देण्यात आले होते. भिंत पाडण्याचे काम सुरू असताना अचानक भिंत कोसळली.

राडारोड्याखाली सापडून बांधकाम मजूर चव्हाण गंभीर जखमी झाला. त्याला उपचारांसाठी रुग्णालयात दाखल करण्यात आले. उपचारादरम्यान त्याचा मृत्यू झाला.या घटनेची माहिती मिळताच पोलिसांनी घटनास्थळी भेट दिली. बांधकाम मजुराच्या सुरक्षेविषयक उपाययोजना न करणे, तसेच सुरक्षाविषयक साधने उपलब्ध करुन न दिल्या प्रकरणी ठेकेदाराविरुद्ध गुन्हा दाखल करण्यात आला. पोलीस उपनिरीक्षक कांबळे तपास करत आहेत.

पीएमपी बसच्या चाकाखाली सापडून एकाचा मृत्यू पीएमपी बसच्या चाकाखाली सापडून दुचाकीवरील सहप्रवाशाचा मृत्यू झाल्याची घटना येरवडा परिसरात घडली. या प्रकरणी लक्ष्मीनगर पोलिसांकडून पीएमपी बस चालकाविरुद्ध गु्न्हा दाखल करण्यात आला आहे. विकी महातो (वय २२ ,रा. धानोरी, विश्रांतवाडी) असे मृत्युमुखी पडलेल्या सहप्रवाशाचे नाव आहे. या प्रकरणी पीएमपी बस चालकाविरुद्ध गुन्हा दाखल करण्यात आला आहे. याबाबत सुभाष दादू कांबळे (वय ५१, रा. गुरुकृपा काॅम्प्लेक्स, शितळादेवी चौक, गुरुवार पेठ) यांनी लक्ष्मीनगर पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दुचाकीस्वार सुभाष कांबळे आणि विकी महातो हे १४ फेब्रुवारी रोजी दुपारी चारच्या सुमारास येरवडा परिसरातून निघाले होते. मेट्रो मार्गिकेच्या परिससरात अचानक एक रिक्षा चालक समोर आला. त्या वेळी दुचाकीस्वार कांबळे आणि सहप्रवासी महातो हे घसरुन रस्त्यात पडले. पाठीमागून येणाऱ्या पीएमपी बसच्या चाकाखाली सापडून महातो गंभीर जखमी झाले. गंभीर जखमी झाालेल्या महातो याला रुग्णालयात दाखल करण्यात आले. उपचारांपूर्वीच त्याचा मृत्यू झाला होता. पोलीस उपनिरीक्षक शेख तपास करत आहेत.