पुणे : मौजमजेसाठी अल्पवयीन मित्राच्या मदतीने दुचाकी चोरणाऱ्या एकाला गु्न्हे शाखेच्या दरोडा आणि वाहनचोरी विरोधी पथकाने पकडले. त्यांच्याकडून पाच दुचाकी जप्त करण्यात आल्या. आदित्य आत्माराम म्हस्के (वय १९, रा. हडपसर) असे अटक करण्यात आलेल्याचे नाव आहे. या प्रकरणी अल्पवयीन मित्राला ताब्यात घेण्यात आले आहे. अल्पवयीन मुलाला ताब्यात घेण्यात आले आहे. त्यांच्याविरुद्ध हडपसर पोलीस ठाण्यात गुन्हा दाखल करण्यात आला आहे. दरोडा आणि वाहनचोरी विरोधी पथकाकडून हडपसर भागात गस्त घालण्यात येत होती. त्या वेळी हिंगणे मळा परिसरात दोघेजण थांबले असून त्यांच्याकडे असलेली दुचाकी चोरीची असल्याची माहिती पोलीस कर्मचारी शिवाजी जाधव आणि मनोज खरपुडे यांना मिळाली. पोलिसांनी त्यांना ताब्यात घेतले. चौकशीत दोघानी लोणी काळभोर, भोसरी, चंदननगर, दौंड भागातून दुचाकी चोरल्याची कबुली दिली. त्यांच्याक़डून पाच दुचाकी जप्त करण्यात आल्या आहेत. वरिष्ठ पोलीस निरीक्षक सुनील पंधरकर यांच्या मार्गदर्शनाखाली उदय काळभोर, राजेश अभंगे, दिनकर लाेखंडे, विनायक रामाणे, शिवाजी जाधव, अमोल सरतापे आदींनी ही कारवाई केली.
