लोकसत्ता प्रतिनिधी
पुणे : पीएमपी बसच्या धडकेत दुचाकीस्वाराचा मृत्यू झाल्याची घटना नगर रस्त्यावरील टाटा गार्डन चौकात घडली. याप्रकरणी पीएमपी चालकाविरुद्ध चंदननगर पोलिसांनी गुन्हा दाखल केला.
अशोक देवबहाद्दुर घर्ती (वय ३२, रा. आनंद पार्क, गणेशनगर, वडगाव शेरी) असे मृत्युमुखी पडलेल्या दुचाकीस्वाराचे नाव आहे. याप्रकरणी पीएमपी चालक रवींद्र गेनबा गायकवाड (वय ४०, रा. श्री स्वामी समर्थ हाइट्स, आंबेगाव पठार, धनकवडी) याच्याविरुद्ध गुन्हा दाखल करण्यात आला आहे. याबाबत अशोक घर्ती यांचा भाऊ गोपाल (वय ३३) यांनी चंदननगर पोलीस ठाण्यात फिर्याद दिली आहे.
आणखी वाचा-शहरातील पदपथांचे लेखापरिक्षण करणार? काय आहे कारण
पोलिसांनी दिलेल्या माहितीनुसार, दुचाकीस्वार अशोक घर्ती बुधवारी सकाळी सहाच्या सुमारास नगर रस्त्यावरुन निघाला होता. चंदनगर भागातील टाटा गार्डन चौकात भरधाव पीएमपी बसने दुचाकीस्वार घर्ती यांना धडक दिली. अपघातात गंभीर जखमी झालेल्या घर्ती यांचा उपचारांपूर्वीच मृत्यू झाला होता, अशी माहिती पोलिसांनी दिली. अपघातानंतर वरिष्ठ पोलीस निरीक्षक संजय चव्हाण यांनी घटनास्थळी भेट दिली. सहायक निरीक्षक दत्तप्रसाद शेंडगे तपास करत आहेत.
नगर रस्ता वर्दळीचा असून, या रस्त्यावर गंभीर स्वरुपाच्या अपघातांचे प्रमाण जास्त आहे. बहुतांश अपघात वेग आणि वाहनचालकांच्या चुकांमुळे होतात.
