पुणे : महापालिकेच्या आरोग्य विभागात वर्षानुवर्षे एकच जबाबदारी सांभाळणाऱ्या सहाय्यक आरोग्य अधिकाऱ्यांच्या जबाबदारीत बदल करण्यात आले आहेत. काही अधिकाऱ्यांबद्दल पालिका आयुक्तांकडे थेट तक्रारी गेल्यानंतर महापालिका आयुक्त डॉ. राजेंद्र भोसले यांनी अधिकाऱ्यांच्या कामात बदल करत त्यांना नवीन जबाबदारी दिली आहे.

महापालिकेच्या आरोग्य विभागातील अधिकाऱ्यांमध्ये असलेल्या अंतर्गत गटबाजीमुळे हा विभाग अनेकदा चर्चेत आला आहे. या विभागातील अधिकाऱ्यांकडे वर्षानुवर्षे केवळ ठराविक खात्यांचीच जबाबदारी असल्याने त्यांच्यामध्ये शीतयुद्ध वेगवेगळ्या माध्यमातून सुरूच असते.

आणखी वाचा

हेही वाचा – येरवडा कारागृहातून पसार झालेल्या कैद्याला महिला पोलीस हवालदाराने पकडले

महापालिकेच्या उपआरोग्य अधिकारी असलेल्या डॉ कल्पना बळीवंत यांच्याकडे जन्म मृत्यू, विवाह नोंदणी आणि स्मशानभूमी, दफनभूमी अद्यावतीकरणची जबाबदारी होती. ही जबाबदारी कमी करून त्यांना मेडिकल कॉलेज व्यवस्थापन, मेडिकल यूनिट आणि आरोग्य विभागाकडील सामान्य प्रशासन तसेच पीसीपीएनडीटी आणि एमटीपीची जबाबदारी देण्यात आली आहे. यापूर्वी पीसीपीएनडीटी आणि एमटीपीची जबाबदारी ही डॉ सूर्यकांत देवकर यांच्याकडे होती. तसेच १ ते ३ लाख पर्यंतची वैद्यकीय बिलांची देयके मान्य करण्याची देखील जबाबदारी देवकर यांना देण्यात आली आहे.

डॉ. मनीषा नाईक यांच्याकडे गेल्या काही वर्षांपासून असलेल्या शहरी गरीब योजना आणि अंशदायी वैद्यकीय सहाय्य योजनेची जबाबदारी सहाय्यक आरोग्य अधिकारी डॉ. संजीव वावरे यांच्याकडे देण्यात आली आहे. तसेच डॉ. वावरे यांच्याकडे औषध भांडार, महापालिका रुग्णालयाचे सुधारणा व आधुनिकीकरण, आरोग्य प्रकल्प, परिमंडळ १ सनियंत्रण व पर्यवेक्षण अधिकारी अशी जबाबदारी देखील देण्यात आली आहे. सहाय्यक आरोग्य अधिकारी डॉ सूर्यकांत देवकर यांच्याकडील सर्व जबाबदाऱ्या कमी करून त्यांना आता नवीन जबाबदाऱ्या देण्यात आल्या आहेत. डॉ देवकर यांच्याकडे जैव वैद्यकीय कचरा विल्हेवाट, नर्सिंग होम रजिस्ट्रेशन, विकेंद्रित परवाना विभाग, एड्स, परिमंडळ ३ च्या सनियंत्रणाची जबाबदारी देण्यात आली आहे.

हेही वाचा – पुणे : मद्यालयातील बिलाच्या वादातून बाऊन्सरकडून सराइताचा खून, सिंहगड रस्ता भागातील घटना

डॉ वैशाली जाधव यांच्याकडे साथरोग नियंत्रण कार्यक्रम, जिल्हा नियोजन समिती, (डीपीसी), महापौर निधी, एनसीडी, परिमंडळ ४ ची जबाबदारी देण्यात आली आहे. तर डॉ राजेश दिघे यांच्याकडे केवळ राष्ट्रीय लसीकरण कार्यक्रमची जबाबदारी होती. ती तशीच कायम ठेवत त्यांना कीटक प्रतिबंधक विभाग, सीएसआर, स्मशानभूमी, दफनभूमी संबंधित कामकाज, बोगस डॉक्टर शोध मोहीम, परिमंडळ ५ चे सनियंत्रण करण्याची जबाबदारी देण्यात आली आहे.