धनादेशावर कंपनी व्यवस्थापनाच्या बनावट स्वाक्षरी करून हिशोब तपासणीसाने (अकाउंटंट) पावणे दोन कोटींची रक्कम स्वतःच्या खात्यावर वळती करून अपहार केल्याचा प्रकार उघडकीस आला आहे. हा प्रकार २ नोव्हेंबर २०२० ते ४ मे २०२३ दरम्यान भोसरी एमआयडीसी येथे घडला. नीलकंठ मच्छिंद्र पाटोले (रा.दिघीरोड, भोसरी) असे गुन्हा दाखल झालेल्या हिशोब तपासणीसाचे नाव आहे. हेही वाचा >>> पिंपरी: वायसीएम रुग्णालयाच्या कचरा कुंडीत सापडले मृत अर्भक; सीसीटीव्ही कॅमेरे तपासण्याचे काम सुरू याबाबत कंपनीचे कायदेशीर सल्लागार अंकेत प्रदीप जैन (वय ३८, रा. गोरेगाव, मुंबई) यांनी एमआयडीसी पोलीस ठाण्यात फिर्याद दिली आहे. आरोपी नीलकंठ हा एमआयडीसीतील एका कंपनीत अकाउंटंट म्हणून काम करत होता. फिर्यादी कंपनीचे कायदेशीर सल्लागार आहेत. आरोपी नीलकंठ याने धनादेशावर कंपनी व्यवस्थापनाची स्वाक्षरी घेतली नाही. कंपनीचे बनावट लेझर बनविले. शिक्के तयार करून लेझरवर मारले. धनादेशावर कंपनी व्यवस्थापनाच्या बनावट स्वाक्षऱ्या केल्या. त्या धनादेशाद्वारे स्वतःच्या बँक खात्यात एक कोटी ८४ लाख ४४ हजार ५०० रुपयांची रक्कम वळवून अपहार केल्याचे फिर्यादीत म्हटले आहे. एमआयडीसी पोलीस तपास करत आहेत.
