लोकसत्ता प्रतिनिधी
पिंपरी : महापालिकेच्या स्थापत्य विभागाची कामे घेण्यासाठी ४० टक्के कमी दराने निविदा भरून रस्ते दुरुस्ती, ‘पेव्हिंग ब्लॉक’ची निकृष्ट कामे करणाऱ्या ११ ठेकेदारांना एका वर्षासाठी काळ्या यादीत टाकण्यात आले आहे. निकृष्ट झालेल्या कामाचे दुप्पट पैसे ठेकेदारांकडून वसूल केले जाणार आहेत.
महापालिकेच्या वतीने विविध विकासकामे केली जातात. स्थापत्य विभागातील रस्तेदुरुस्ती, ‘पेव्हिंग ब्लॉक’, मातीचे ‘जॉगिंग ट्रॅक’ची कामे घेण्यासाठी ११ ठेकेदारांनी ४० ते ४५ टक्के कमी दराने निविदा भरल्या. कमी दर देत १४ विकासकामे घेतली. मात्र, एवढ्या कमी दरात घेतलेल्या कामाचा दर्जा, गुणवत्तेबाबत आयुक्त शेखर सिंह यांना खात्री नव्हती. त्यामुळे त्यांनी ११ ठेकेदारांच्या कामाचा दर्जा तपासण्याचा आदेश दक्षता विभागाला दिले होते. दक्षता विभागाने शासकीय अभियांत्रिकी महाविद्यालयाकडून (सीओईपी) कामांच्या दर्जाची तपासणी करून घेतली.
आणखी वाचा-पिंपरी-चिंचवडमधील वाहतुकीत बुधवारपासून बदल; वाचा कसा असेल बदल?
‘सीओईपी’ने केलेल्या तपासणीत पेव्हिंग ब्लॉक कामात खचलेले ब्लॉक, ज्या ठिकाणी दुरुस्ती आवश्यक अशा ठिकाणी दुरुस्तीच केली नाही. महापालिका मानांकनानुसार काम नाही, रस्ते दुरुस्ती केल्यानंतर त्वरित खड्डे पडणे, काँक्रीट थराची जाडी कमी असणे, जॉगिंग ट्रॅकवर कमी माती टाकणे, निविदेनुसार काम न करणे अशा विविध बाबी समोर आल्या. या अहवालानंतर महापालिकेने निकृष्ट कामे करणाऱ्या ११ ठेकेदारांना कारणे दाखवा नोटीस पाठवून खुलासा मागविला. मात्र, एकाही ठेकेदाराने समाधानकारक खुलासा सादर केला नाही. त्यानंतर ११ ठेकेदारांना एका वर्षासाठी काळ्या यादीत टाकण्याचा आणि निकृष्ट झालेल्या कामाचा दुप्पट खर्च वसूल करण्याचा निर्णय घेतला आहे.
वर्षासाठी काळ्या यादीत
अजय घनश्याम खेमचंदानी, अनिकेत एंटरप्रायजेस, चैताली सप्लायर्स, कविता एंटरप्रायजेस, काव्या असोसिएट्स, मोटवानी ॲण्ड सन्स, नामदे एंटरप्रायजेस, आर. जी. मंगळवेढेकर, रामचंद्र एंटरप्रायजेस, सनसारा कन्स्ट्रक्शन आणि सोहम एंटरप्रायजेस या ११ ठेकेदारांना एक वर्षासाठी काळ्या यादीत टाकण्यात आले आहे.
निकृष्ट कामे करणाऱ्या ११ ठेकेदारांना एका वर्षासाठी काळ्या यादीत टाकले आहे. निकृष्ट झालेल्या कामाचे दुप्पट पैसे वसूल केले जाणार असल्याचे पिंपरी-चिंचवड महापालिकेचे शहर अभियंता मकरंद निकम यांनी सांगितले.
