वृद्ध आई-वडिलांचा सांभाळ नाकारणाऱ्या मुलाला दणका; तक्रारीनंतर मुलाविरुद्ध थेट गुन्हा दाखल

या प्रकरणी ४५ वर्षीय मुलाविरुद्ध गुन्हा दाखल करण्यात आला आहे. याबाबत ८२ वर्षीय वडिलांनी काळेपडळ पोलीस ठाण्यात फिर्याद दिली आहे. ज्येष्ठ नागरिक आणि पालक यांचे पालन पोषण आणि कल्याण अधिनियम २००७ च्या कलम २४ नुसार गुन्हा दाखल करण्यात आला आहे. पोलिसांनी दिलेल्या माहितीनुसार, मुलाकडून सांभाळ न केला जात असल्याने वडिलांनी उपविभागीय अधिकारी कार्यालयातील ज्येष्ठ नागरिक निर्वाह न्यायाधिकारणाकडे तक्रार दिली होती. त्यानंतर न्यायाधिकरणाने वृद्ध आई-वडिलांना दरमहा दहा हजार रुपये देण्याचे आदेश दिले होते. न्यायाधिकरणाच्या आदेशानंतर मुलाने पैसे देण्यास टाळाटाळ केली, तसेच आदेशाचे पालन केले नाही.

वृद्ध आई-वडिलांचा सांभाळ करण्यास नकार दिला. आदेशाचे पालन होत नसल्याने वडिलांनी काळेपडळ पोलीस ठाण्यात तक्रार दिली. आदेशाचा अवमान केल्या प्रकरणी गुन्हा दाखल करण्याची मागणी केली. त्यानुसार काळेपडळ पोलिसांकडून मुलाविरुद्ध गुन्हा दाखल करण्यात आला. सहायक पोलीस निरीक्षक प्रवीण अब्दागिरे तपास करत आहेत.

धनकवडी, हडपसरमध्ये घरातून लॅपटाॅप चोरी

धनकवडी, तसेच हडपसर भागातील घरातून चोरट्यांनी लॅपटाॅप आणि मोबाइल संच चोरून नेल्याच्या घटना घडल्या. या प्रकरणी चोरट्यांविरुद्ध गुन्हा दाखल करण्यात आला. धनकवडीतील चव्हाणनगर भागात एका घराची खिडकी उघडी असल्याची संधी साधून चोरट्यांनी लॅपटाॅप आणि मोबाइल संच ७३ हजार ५०० रुपयांचा मुद्देमाल चोरून नेला. याबाबत एकाने सहकारनगर पोलीस ठाण्यात फिर्याद दिली आहे. तक्रारदार हे चव्हाणनगर भागात राहायला आहेत.

मंगळवारी (१४ एप्रिल) मध्यरात्री दोनच्या सुमारास त्यांच्या घराची खिडकी उघडी होती. चोरट्यांनी खिडकीजवळ ठेवलेला लॅपटाॅप आणि मोबाइल संच चोरून नेला. पोलीस हवालदार अमोल पवार तपास करत आहेत. हडपसरमधील हांडेवाडी रस्त्यावर एका वसतिगृहातून चोरट्यांनी दोन लॅपटाॅप, मोबाइल संच असा ७० हजार रुपयांचा मुद्देमाल चोरून नेल्याची घटना घडली. याबाबत एकाने काळेपडळ पोलीस ठाण्यात फिर्याद दिली आहे. तक्रारदार तरुण हा हांडेवाडी रस्त्यावरील एका वसतिगृहात राहायला आहे. चोरट्यांनी मंगळवारी (१४ एप्रिल) सकाळी वसतिगृहातून दोन लॅपटाॅप आणि मोबाइल संच चोरून नेल्याचा प्रकार उघडकीस आला. पोलीस उपनिरीक्षक जयश्री पाटोळे तपास करत आहेत.