शहर पोलीस दलातील पाच हजार पोलीस कर्मचारी टपाली मतदान करणार आहेत. लोकसभा निवडणुकीच्या वेळी टपाली मतदान आणि इलेक्शन डय़ुटी सर्टिफिकेटच्या माध्यमातून अडीच हजार पोलीस व अधिकाऱ्यांनी मतदान केले होते. त्यात या वेळी आणखी अडीच हजारांची भर पडली आहे.शहर पोलीस दलात सुमारे नऊ हजार पोलीस कर्मचारी आहेत. मात्र, यातील बऱ्याच पोलीस कर्मचाऱ्यांची नावे कोठे आहेत हे न सापडल्यामुळे व इतर प्रशासकीय यंत्रणेमुळे लोकसभा निवडणुकीच्या वेळी फक्त अडीच हजार पोलीस कर्मचारी व अधिकाऱ्यांना मतदानाचा हक्क बजावता आला होता. या वेळी जास्त पोलिसांना मतदान करता यावे यासाठी पोलीस आयुक्तालयाकडून प्रयत्न करण्यात आले. त्यानुसार विधानसभा निवडणुकीत शहर पोलीस दलातील पाच हजार पोलीस कर्मचारी व अधिकारी मतदानाचा हक्क बजावणार आहे. हे सर्व जण टपाली मतदान करणार आहेत, असे मुख्यालयाचे पोलीस उपायुक्त तुषार दोषी यांनी सांगितले.