चिंचवड : चिंचवड विधानसभा मतदारसंघातील शरद पवार गटाचे राहुल कलाटे यांनी ईव्हीएम मशीन पडताळणीसाठी अर्ज केला आहे. चिंचवड मधून आमदार शंकर जगताप विरुद्ध महाविकास आघाडीचे राहुल कलाटे असा सामना रंगला होता. चिंचवडमधून जगताप हे एक लाखांपेक्षा अधिक मताधिक्याने विजयी झाले होते. यावर आक्षेप घेत राहुल कलाटे यांनी ईव्हीएम पडताळणीसाठी अर्ज केला आहे.
राहुल कलाटे यांनी काही मुद्दे मांडले आहेत. चिंचवड विधानसभा मतदारसंघातील निवडणूक होत असताना अवघ्या महाराष्ट्रात निवडणूक होत होती. चिंचवड विधानसभा मतदारसंघात राज्यातील विविध ठिकाणी राहणाऱ्या मतदारांची संख्या जास्त आहे. चिंचवड मधील हजारो मतदार हे त्यांच्या मूळ गावी मतदानासाठी गेले तरी देखील चिंचवड मध्ये मतदानाचा टक्का वाढला कसा? असा प्रश्न राहुल कलाटे यांनी उपस्थित करत आक्षेप घेतला असून ईव्हीएम पडताळणीसाठी अर्ज केला आहे.
आणखी वाचा-पुणेकरांसाठी खूशखबर! स्वतंत्र सरकारी कर्करुग्णालय उभे राहणार
एक बूथ साठी जीएसटीसह तब्बल ४७ हजार रुपये मोजले आहेत. अशी एकूण २५ बूथ बाबत त्यांनी पैसे भरले आहेत. अशी माहिती राहुल कलाटे यांनी दिली आहे. अर्ज करून राहुल कलाटे यांना तीन – चार दिवस झाले असले तरी अद्याप तरी निवडणूक आयोग कडून त्यांना उत्तर मिळालेलं नाही. ४५ दिवसात उत्तर मिळणं अपेक्षित असल्याचं त्यांनी म्हटलं आहे. त्यामुळे ते निवडणूक आयोगाच्या उत्तराची प्रतीक्षा करत आहेत.
