महापालिका आयुक्त श्रावण हर्डीकर यांची ग्वाही कोणत्याही महिला अधिकाऱ्याशी अथवा कर्मचाऱ्यांशी गैरवर्तन केल्यास त्याची गंभीर दखल घेण्यात येईल, असे सांगतानाच जो प्रकार पर्यावरण विभागात झाला, त्याची पुनरावृत्ती होता कामा नये, अशी तंबी महापालिका आयुक्त श्रावण हर्डीकर यांनी दिली आहे. शहरातील कचऱ्याच्या समस्येकडे प्राधान्याने लक्ष दिले जाईल. विविध ठिकाणी मोठय़ा प्रमाणात अनधिकृत नळजोड आहेत. शक्य असतील तितकेच नियमित करण्यात येईल, इतर नळजोडांवर मात्र कारवाई करण्यात येईल, असे आयुक्तांनी स्पष्ट केले. महापालिका आयुक्तांनी मंगळवारी विविध विषयांवर पत्रकारांशी संवाद साधला. स्वच्छतेचा विषय आपण गांभीर्याने घेतलेला आहे. महापालिकेकडे मनुष्यबळ कमी आहे, वाहनांची संख्या मर्यादित आहे. पुढील तीन महिन्यांत कचरा उचलण्याची निविदा काढण्यात येणार आहे. शहर वाढतेय, तशी स्वच्छतेची समस्या वाढत आहे. त्या दृष्टीने आवश्यक पावले उचलण्याची कार्यवाही सुरू करण्यात आल्याचे आयुक्तांनी स्पष्ट केले. सर्पोद्यानातील गैरप्रकारांच्या तक्रारींची दखल घेण्यात आली असून त्या दृष्टीने विभागीय चौकशी सुरू आहे. महापालिका मुख्यालयातच असलेल्या उपाहारगृहाच्या अतिक्रमणाकडे दुर्लक्ष करण्यात येत असल्याचा मुद्दा पत्रकारांनी निदर्शनास आणून दिला असता, याबाबत तपासून घेऊन आवश्यक ती कार्यवाही करू, असे ते म्हणाले. निगडी ते दापोडीचा बीआरटी मार्ग लवकरच सुरू करण्याचा प्रयत्न आहे. मेट्रोच्या कामामुळे पुढील काळात वाहतुकीची कोंडी वाढणार आहे, त्या दृष्टीने बीआरटी मार्ग सुरू होणे व त्यातून पीएमपी बस धावणे आवश्यक आहे, असे ते म्हणाले. खरेदीच्या विविध विषयांवरून होणारे आरोप-प्रत्यारोप पाहता पालिकेच्या वतीने खरेदी करण्यात येणाऱ्या वस्तूंसाठी विशिष्ट धोरणच ठरवण्यात येणार आहे. नियमानुसारच खरेदी होईल, याची खबरदारी घेतली जाईल. पवना बंद नळयोजनेविषयी शासनस्तरावर पाठपुरावा सुरू आहे. नेमके कोणत्या स्तरावर अडचण निर्माण झाली आहे, ते सांगता येणार नाही. लाचलुचपत विभागाचा अहवाल प्राप्त झाल्यानंतर लेखाधिकारी किशोर शिंगे यांच्यावरील कारवाई निश्चित करण्यात येईल, असे आयुक्तांनी स्पष्ट केले.
