पुणे : महिलांच्या गळ्यातील दागिने हिसकावणाऱ्या चोरट्याला गुन्हे शाखेच्या दराेडा आणि वाहन चोरी विरोधी पथकाने अटक केली. अटक करण्यात आलेला चोरटा मूळचा बिहारचा असून, त्याच्याकडून सोन्याचे दागिने आणि दुचाकी जप्त करण्यात आली.
तरुण बलराम झा (वय २६, रा. पठारे वस्ती, सुपेनगर, खराडी, मूळ रा. पाटणा, बिहार) असे अटक केलेल्या चोरट्याचे नाव आहे. याबाबत एका ५० वर्षीय महिलेने मुंढवा पोलीस ठाण्यात फिर्याद दिली होती. तक्रारदार महिला १८ मे रोजी मुंढव्यातील केशवनगरमधील भागात नातेवाइकांच्या घरी एका कार्यक्रमासाठी गेल्या होत्या. तेथून दुपारी तीनच्या सुमारास त्या घरी निघाल्या होत्या. त्या वेळी दुचाकीवरून आलेल्या चोरट्याने त्यांच्या गळ्यातील ९० हजार रुपयांचे मंगळसूत्र हिसकावून नेले होते.
याप्रकरणी गुन्हा दाखल झाल्यानंतर दरोडा आणि वाहन चोरी पथकातील सहायक पोलीस निरीक्षक सी. बी. बेरड आणि पथक चोरट्याचा शोध घेत होते. पोलीस कर्मचारी शशिकांत नाळे, विनायक साळवे यांना सराईत चोरटा तरुण झा याने दागिने हिसकावण्याचा गुन्हा केल्याची माहिती मिळाली. तो २३ मे रोजी हडपसर भागातील मगरपट्टा येथे थांबल्याची माहिती मिळाली. त्यानंतर पोलिसांच्या पथकाने सापळा लावून त्याला ताब्यात घेतले.
आरोपी झा याच्याविरुद्ध यापूर्वी भारती विद्यापीठ आणि सहकारनगर पोलीस ठाण्यात दागिने हिसकावण्याचे गुन्हे दाखल झाले आहेत. त्याच्याकडून ९० हजारांचे मंगळसूत्र आणि दुचाकी असा दीड लाख रुपयांचा मुद्देमाल जप्त करण्यात आला. पोलीस उपायुक्त निखिल पिंगळे, सहायक आयुक्त गणेश इंगळे, राजेंद्र मुळीक यांच्या मार्गदर्शनाखाली वरिष्ठ पोलीस निरीक्षक नंदकुमार बिडवई, संदीपान पवार, सहायक निरीक्षक सी. बी. बेरड, पोलीस कर्मचारी शशिकांत नाळे, विनायक साळवे, मच्छिंद्र डापसे, बाळासाहेब तनपुरे, राजू पुणेकर, गणेश ढगे यांनी ही कामगिरी केली.
