Hookah Parlour Raid: विमाननगरमध्ये घरात थाटले हुक्का पार्लर; पोलिसांचां छापा; तिघांविरुद्ध गुन्हा

विमाननगर पोलीस ठाण्याचे पथक गस्त घालत होते. त्यावेळी म्हाडा काॅलनीतील एका सदनिकेत हुक्का पार्लर थाटण्यात आल्याची माहिती पोलीस उपनिरीक्षक नितीन राठोड यांना मिळाली. त्यानंतर पोलिसांच्या पथकाने तेथे छापा टाकला. आरोपींना ताब्यात घेण्यात आले. सनदिकेतून हुक्का पात्र, तसेच अन्य साहित्य जप्त करण्यात आले. आरोपी ऑनलाइन मागणीनुसार हुक्का पुरवित होते, अशी माहिती तपासात मिळाली. याबाबत पोलीस कर्मचारी हरिप्रसाद पुंडे यांनी फिर्याद दिली आहे. परिमंडळ चारचे पोलीस उपायुक्त सोमय मुंडे यांच्य मार्गदर्शनाखाली वरिष्ठ पोलीस निरीक्षक गोविंद जाधव, गुन्हे शाखेचे निरीक्षक शरद शेळके आणि पथकाने ही कारवाई केली. आरोपी मूळचे उत्तर प्रदेशातील आहेत.

मुंबईतील कमला मिल परिसरात एका हाॅटेलमध्ये लागलेल्या आगीत नागरिकांचा होरपळून मृत्यू झाला होता. इमारतीतील हुक्का पार्लरमध्ये आग लागली होती. त्यानंतर आग भडकली हाेती. राज्यशसनाने या घटनेची गंभीर दखल घेऊन हुक्का पार्लरवर बंदी घातली होती.

वाघोलीत ११ लाखांचे मेफेड्रोन जप्त

नगर रस्त्यावरील वागोली भागात मेफेड्रोन विक्रीसाठी आलेल्या एकाला अमली पदार्थ विरोधी पथकाने पकडले. त्याच्याकडून ११ लाख १० हजार रुपयांचे मेफेड्रोन जप्त करण्यात आले. लेखाराम धर्मराज चौधरी (वय २७, रा. केसनंद-वाघोली रस्ता, मूळ रा. जोधपूर, राजस्थान) असे अटक करण्यात आलेल्याचे नाव आहे. वाघोली परिसरात गुन्हे शाखेचे अमली पदार्थ विरोधी पथक गस्त घालत होते. त्यावेळी चौधरी मेफेड्रोन विक्री करण्याच्या तयारीत असल्याची माहिती पोलीस कर्मचारी संदीप देवकाते यांना मिळाली. पोलिसांच्या पथकाने सापळा लावून त्याला पकडले. त्याची झडती घेण्यात आली. तेव्हा त्याच्यकडे ५१ ग्रॅम मेफेड्रोन सापडले. जप्त केलेल्या मेफेड्रोनची किंमत ११ लाख १० हजार रुपये आहे. चौधरीने मेफेड्रोन कोणाकडून आणले, तसेच तो कोणाला विक्री करण्याच्या तयारीत होता ? यादृष्टीने पोलिसांकडून तपास करण्यात येत आहे.

पोलीस उपायुक्त निखील पिंगळे यांच्या मार्गदर्शनाखाली पोलीस निरीक्षक सुदर्शन गायकवाड, पोलीस कर्मचारी संदीप गायकवाड, दत्तात्रय खरपुडे, पृथ्वीराज पांडुळे, संदीप देवकाते आणि पथकाने ही कारवाई केली. अमली पदार्थ विरोधी पथकाने मेफेड्रोन विक्री प्रकरणात बिबवेवाडी भगाात एका रिक्षाचालक तरुणाला नुकतीच अटक केली होती. त्याच्याकडून सहा लाख रुपयांचे मेफेड्रोन जप्त करण्यात आले. याप्रकरणात अटक करण्यात आलेला रिक्षाचालक आदिल बागवान (वय ३५,रा. पानसरेनगर, येवलेवाडी) हा मुंबईहून मेफेड्रोन आणून विक्री करत असल्याची माहिती तपासात मिळाली होती.