पुणे : मिळकतकर थकबाकीदारांसाठी राबविण्यात येत असलेल्या अभय योजनेअंतर्गत पंधरा दिवसांत ३५ कोटी १८ लाखांचे उत्पन्न महापालिकेला प्राप्त झाले आहे. १६ हजार ९५२ मिळकतकर थकबाकीदारांनी दंडाच्या रकमेवरील सवलतीचा लाभ घेत मिळकतकर जमा केला आहे. अभय योजनेची मुदत २६ जानेवारी रोजी संपणार असून थकबाकीदारांना मोठय़ा प्रमाणावर कर भरणा करता यावा, यासाठी शनिवार आणि रविवार (२३ आणि २४ जानेवारी) सुटीच्या दिवशीही कर भरणा केंद्र सुरू ठेवण्यात येणार आहे. दरम्यान, गेल्या दहा महिन्यात मिळकतकरातून एकूण १ हजार ४०० कोटींचे उत्पन्न प्राप्त झाल्याची माहिती कर आकारणी आणि कर संकलन विभागाकडून देण्यात आली.

या बातमीसह सर्व प्रीमियम कंटेंट वाचण्यासाठी साइन-इन करा

महापालिकेच्या उत्पन्नाचा प्रमुख स्त्रोत असलेल्या मिळकतकराची थकबाकी वसुलीसाठी महापालिकेकडून विविध उपाययोजना सुरू आहेत. यंदा एक एप्रिलपासून मिळकतकर देयकाची छपाई, देयकांचे वाटप वेळेत पूर्ण करण्यात आले. तसेच पहिल्या तीन महिन्यांमध्ये ज्यांनी नियमित कर भरला आहे, त्यांना मिळकतकरामध्ये १५ टक्के सवलत देण्यात आली आहे. ऑगस्ट महिन्यापासून मिळकतकर वसुलीसाठी मोहीम आखण्यात आली असून व्यावसायिक वापर असलेल्या मिळकतींच्या थकबाकी वसुलीसाठी पाठपुरावा सुरू झाला आहे. कर भरण्यास टाळाटाळ करणाऱ्या ३ हजार व्यावसायिक मिळकतींची अटकावणी करण्यात आली असून व्यावसायिक मिळकतकरधारकांनी ३३ कोटी ३९ लाख रुपयांचा कर जमा केला आहे. तसेच काही मिळकतधारकांनी २१  कोटींच्या रकमेचे धनादेश कर आकारणी आणि कर संकलन विभागाल दिले आहेत, अशी माहिती कर आकारणी आणि कर संकलन विभागाचे प्रमुख विलास कानडे यांनी दिली.

Pune News (पुणे न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Income tax arrears abhay yojana ysh
First published on: 21-01-2022 at 00:02 IST