युतीतील २५ वर्षे अंडी उबवण्यातच; मुख्यमंत्री उद्धव ठाकरे यांचे विधान

बारामती येथील इन्क्युबेशन आणि इनोव्हेशन सेंटर या इमारतीचे उद्धाटन उद्धव ठाकरे यांच्या हस्ते झाले.

मुख्यमंत्री उद्धव ठाकरे यांचे विधान

बारामती : इन्क्युबेशन सेंटरला मराठीमध्ये उबवणी केंद्र म्हणतात. आमची गेली पंचवीस वर्षे अंडी उबविण्यातच गेली. त्यातून जे बाहेर आले ते तुमच्यासमोरच आहे, अशा शब्दांत मुख्यमंत्री उद्धव ठाकरे यांनी नामोल्लेख टाळून भाजपसमवेतच्या युतीबाबत मंगळवारी खोचक विधान केले. दिवाळीत काही जण फटाके फोडू इच्छित आहेत. जे फटाके तुम्हाला फोडायचे आहेत ते फोडा , पण धूर काढू नका. कारण करोना अजून संपलेला नाही, अशी टिपणी करीत ठाकरे यांनी देवेंद्र फडणवीस यांच्यावर टीका केली. 

बारामती येथील इन्क्युबेशन आणि इनोव्हेशन सेंटर या इमारतीचे उद्धाटन उद्धव ठाकरे यांच्या हस्ते झाले. त्या वेळी ते बोलत होते.  राष्ट्रवादी काँग्रेसचे अध्यक्ष शरद पवार, ज्येष्ठ उद्योगपती बाबा कल्याणी, अतुल किर्लोस्कर, विधान परिषदेच्या उपसभापती डॉ. नीलम गोऱ्हे, उपमुख्यमंत्री अजित पवार, खासदार सुप्रिया सुळे, रश्मी ठाकरे, राज्यमंत्री  दत्तात्रय भरणे, आमदार रोहित पवार, संस्थेचे अध्यक्ष राजेंद्र पवार, जिल्हा बँकेचे अध्यक्ष रमेश थोरात आणि बारामतीच्या नगराध्यक्षा पौर्णिमा तावरे या वेळी उपस्थित होत्या.

संपूर्ण पवार कुटुंबीयच विकासाच्या ध्यासात रमले आहे. विकास कामांसाठी आम्ही जरूर एकत्र येऊ, असे ठाकरे म्हणाले.

शरद पवार म्हणाले, पन्नास वर्षांपूर्वी कृषी विकास प्रतिष्ठान आणि विद्या प्रतिष्ठान या दोन संस्थांच्या माध्यमातून आम्ही शून्यातून कामाला सुरुवात केली. पूर्वी पाण्याचा प्रश्न महत्त्वाचा होता. उपलब्ध पाण्याच्या थेंबांथेंबाचा शेतीसाठी उपयोग कसा करता येईल यासाठी डॉ. अप्पासाहेब पवार यांनी नव्या तंत्रज्ञानाचा वापर करून विकासाला गती दिली.

शेती, शिक्षण आणि साहित्य या तीन विषयांसाठी शरद पवार विद्यावृत्ती सुरू करणार असल्याचे सुळे यांनी जाहीर केले. अजित पवार, बाबा कल्याणी, अतुल किर्लोस्कर यांनी मनोगत व्यक्त केले.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व पुणे बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Incubation center chief minister uddhav thackeray bjp ncp president sharad pawar akp

Next Story
मेट्रोचे स्टेशन कोथरूडच्या कचरा डेपोच्या जागीच होणार