दोन लाखांची लाच घेताना प्रांतधिकाऱ्याला अटक; लाचलुचपत प्रतिबंधक विभागाची कारवाई

या बाबत एका बांधकाम व्यावसायिकाने एसीबीकडे तक्रार दिली होती. या प्रकरणी प्रांत अधिकारी गोविंद पंढरीनाथ शिंदे (वय ४६) यांना अटक करण्यात आली आहे. त्यांच्याविरुद्ध मंचर पोलीस ठाण्यात गुन्हा दाखल करण्यात आला आहे. तक्रारदार बांधकाम व्यावसायिकाने पुणे – नाशिक महामार्गावर इमारत बांधली होती. या इमारतीचे जवळपास काम पूर्ण झाले होते. या इमारतीचा दाखला मिळवण्यासाठी बांधकाम व्यावसायिकाने प्रस्ताव अर्ज सादर केला होता. नगररचना विभागाचे ना-हरकत प्रमाणपत्र मिळाल्यानंतर संबंधित प्रस्ताव प्रांताधिकारी शिंदे यांनी प्रलंबित ठेवला होता.

त्यानंतर २० मार्च रोजी तक्रारदार बांधकाम व्यावसायिकाने शिंदे यांची भेट घेतली. तेव्हा शिंदे यांनी त्यांच्याकडे पाच लाख रुपयांची लाच मागितली. बांधकाम व्यावसायिकाने तडजोडीत दोन लाख रुपयांची लाच देण्याचे मान्य करून ‘एसीबी’कडे तक्रार दिली होती. तक्रारीची पडताळणी करण्यात आली. शुक्रवारी दुपारी मंचर येथील महसूल विभागाच्या कार्यालयात सापळा लावून तक्रारदाराकडून दोन लाखांची लाच घेताना शिंदे यांना ताब्यात घेण्यात आले.

या प्रकरणी भ्रष्टाचार प्रतिबंधक कायद्यान्वये मंचर पोलीस ठाण्यात गुन्हा दाखल करून रात्री त्यांना अटक करण्यात आली. पोलीस अधीक्षक शिरीष सरदेशपांडे यांच्या मार्गदर्शनाखाली पोलीस निरीक्षक प्रसाद लोणारे आणि पथकाने कारवाई केली.