पुणे : खराडी परिसरातील कॉल सेंटरमधून अमेरिकेतील नागरिकांना ‘डिजिटल’ अटक करण्याची भीती दाखवून लाखो रुपयांची फसवणूक केल्याच्या प्रकरणात पसार झालेल्या काॅल सेंटर चालकासह तीन साथीदारांचा शोध घेण्यात येत असून, पुणे पोलिसांचे पथक तपासासाठी गुजरातला रवाना झाले आहे. रविवारी पसार आरोपींच्या शोधासाठी गुन्हे शाखेने नवी मुंबईत छापे टाकले होते.
करण शेखावत (रा. अहमदाबाद), संजय मोरे आणि केतन गव्हाणे हे तिघे पसार झाले आहेत. करण शेखावत हा सूत्रधार असल्याचे तपासात उघडकीस आले. पसार आरोपींचा गुन्हे शाखेच्या युनिट चारकडून शोध घेण्यात येत आहे. नवी मुंबईत छापे टाकल्यानंतर आरोपी शेखावत, मोरे, गव्हाणे सापडले नाहीत. त्यानंतर पोलिसांचे पथक गुजरातला रवाना झाले आहे, अशी माहिती गुन्हे शाखेतील अधिकाऱ्यांनी दिली.
खराडी-मुंढवा रस्त्यावरील प्राइड आयकॉन या इमारतीच्या नवव्या मजल्यावर ‘मॅग्नटेल बीपीएस अँड कन्सल्टंट’ या नावाने हे कॉल सेंटर सुरू होते. या कॉल सेंटरमध्ये १२३ कर्मचारी काम करीत होते. त्यांच्याकडे दररोज सुमारे एक लाख अमेरिकन नागरिकांचा डेटा देण्यात येत होता. ‘तुमच्या खात्यातून अमली पदार्थ खरेदी व्यवहार झाले आहेत, तुम्हाला पोलिसांकडून अटक केली जाऊ शकते,’ अशी भीती घालून ३० ते ४० हजार डॉलर्स (सुमारे ३२ ते ३३ लाख रुपये) अमेरिकन नागरिकांकडून उकळले जात होते.
हा पैसा हवालाच्या माध्यमातून देशात येत असल्याचेही पोलीस तपासात उघडकीस आले. सायबर गुन्हे शाखा, तसेच गुन्हे शाखेच्या पथकाने शनिवारी (२४ मे) मध्यरात्री तेथे छापा टाकला. याप्रकरणी पाच जणांना अटक करण्यात आली. अटक केलेले आरोपी गुजरात, राजस्थान या राज्यांतील असून, बहुतांश कर्मचारी परराज्यांतील आहेत.
