लोहगडावर केतनला धक्का कोणी दिला? सियाने की चेतनने? पोलीस तपासात आतापर्यंत काय समोर आलं..वाचा सविस्तर

पुणे ग्रामीणचे एसपी संदीप सिंग गिल यांनी पत्रकार परिषदेत दिलेल्या माहितीनुसार आणि आतापर्यंतच्या पोलीस तपासात पुढील धक्कादायक बाबी समोर आल्या आहेत:

मुख्य मारेकरी कोण? धक्का कुणी दिला याचं गूढ कायम

पोलीस तपासात सिया आणि चेतन या दोघांनी मिळून केतनची हत्या केल्याचे निष्पन्न झाले असले, तरी कड्यावरून केतनला नेमका धक्का कोणी दिला, याचा थांगपत्ता पोलिसांना अद्याप लागलेला नाही. घटनेच्या वेळी केतनच्या अगदी जवळ सिया होती, त्यामुळे तिने धक्का दिला की तिथे दबा धरून बसलेल्या चेतन चौधरीने त्याला दरीत ढकलले, हे अद्याप स्पष्ट झालेले नाही.

हत्येसाठी लोहगडची निवड; आधी दोनदा केली होती ‘रेकी’

केतनला मारण्यासाठी लोहगड किल्ल्याची निवड अचानक केली नव्हती, तर सियाने आधी दोन वेळा त्या जागेची ‘रेकी’ केली होती:

३१ मे: सिया केतनला घेऊन पहिल्यांदा लोहगडावर गेली होती.

४ जून: तिने पुन्हा केतनला गडावर बोलावले होते, मात्र काही कारणास्तव केतन जाऊ शकला नाही.

१४ जून: सियाने पुन्हा केतनला लोहगडावर नेऊन परिसराची कसून पाहणी केली होती.

१८ जून (घटनेचा दिवस): ठरलेल्या कटानुसार, चेतन चौधरी हा केतन आणि सिया पोहचण्यापूर्वीच लोहगडावर जाऊन दबा धरून बसला होता.

पोलिसांची दिशाभूल करण्यासाठी रचला होता ‘मास्टरप्लॅन’

पोलिसांना संशय येऊ नये म्हणून चेतन चौधरीने स्वतःचा मोबाईल घरीच ठेवून दिला होता, जेणेकरून त्याचे लोकेशन लोहगड परिसरात दिसणार नाही. त्याऐवजी त्याने त्याच्या एका कर्मचाऱ्याचा मोबाईल सोबत आणला होता आणि तो त्याद्वारे सियासोबत व्हॉट्सॲपवर संपर्कात होता. चेहरा लपवून फिरणाऱ्या चेतनवर पोलिसांना संशय आला आणि तांत्रिक पुराव्यांच्या आधारे हा कट उघड झाला.

बाली ट्रिप रद्द करून रचला हत्येचा कट

सिया गोयल आणि चेतन चौधरी यांच्यात गेल्या एका वर्षापासून बिझनेसच्या निमित्ताने सलगी वाढली होती. सियाला केतनसोबत लग्न करायचे नव्हते. १९ जून रोजी तिचा वाढदिवस होता आणि केतनसोबत तिला तो साजरा करायचा नव्हता. इतकेच नव्हे तर बालीला जाण्याचे ठरले असताना सियानेच केतनचा पासपोर्ट स्वतःकडे काढून घेतला होता जेणेकरून ट्रिप रद्द व्हावी आणि १८ जून रोजी तिने केतनला ट्रेकिंगच्या बहाण्याने लोहगडावर आणले.

अपघाताचा बनाव फसला

१८ जून रोजी केतनला कड्यावरून ढकलल्यानंतर सियाने आरडाओरडा करून सुरक्षारक्षकांना बोलावले आणि केतनच्या कुटुंबीयांना फोन करून तो पाय घसरून पडल्याचा बनाव रचला. पोलिसांनी सुरुवातीला अकस्मात मृत्यूची नोंद केली होती, पण लोहगड किल्ल्यावर चेतन चौधरी संशयास्पदरीत्या दिसल्याने पोलिसांना घातपाताचा संशय आला. पोलिसांनी खाक्या दाखवताच दोघांनी गुन्ह्याची कबुली दिली आहे.

केतनला मारायचा प्लॅन किमान एक आठवडा आधीच ठरला होता हे स्पष्ट झाले असले, तरी प्रत्यक्ष कड्यावरून ढकलणारा मुख्य आरोपी कोण, हे पोलीस तपासाच्या पुढील टप्प्यात समोर येण्याची अपेक्षा आहे. पुणे ग्रामीण पोलीस या प्रकरणी पुढील कायदेशीर कारवाई करत आहेत.