पुणे : सोलापूर रस्त्यावरील थेऊर परिसरात एका टेम्पोतून ४९५ किलो तांब्याच्या तारा चोरणाऱ्या तिघांना लोणी काळभोर पोलिसांनी अटक केली. चोरलेल्या तारांची किंमत तीन लाख रुपये आहे. सूरज शाम जाधव (वय १९), यश अजित सावंत (वय २१), महेश बसवराज पुजारी (वय २२, तिघे रा. चव्हाणवस्ती, थेऊर) अशी अटक केलेल्यांची नावे आहेत. याबाबत समाधान हिराजी डोंगरे (रा. थेऊर, ता. हवेली) यांनी लोणी काळभोर पोलिसांत फिर्याद दिली आहे.
६ जून रोजी रात्री अकराच्या सुमारास डोंगरे यांनी त्यांचा टेम्पो थेऊर गावातील जय मल्हार हॉटेलसमोरील मोकळ्या जागेत उभा केला होता. टेम्पोत जुन्या आणि जळालेल्या तांब्याच्या तारांचे एकूण ५५ पोती ठेवली होती. चोरट्यांनी तारा चोरून नेल्या. दुसऱ्या दिवशी सकाळी तांब्याच्या तारा चोरीला गेल्याचे दिसून आले. या पोत्यांमध्ये एकूण ४९५ किलो वजनाच्या तीन लाख १ हजार ९५० रुपयांच्या तांब्याच्या तारा होत्या.
याप्रकरणी गुन्हा दाखल झाल्यानंतर वरिष्ठ निरीक्षक राजेंद्र पन्हाळे यांच्या मार्गदर्शनाखाली तपास सुरू करण्यात आला. तांत्रिक तपासात पाेलीस कर्मचारी प्रदीप गाडे, राहुल कर्डीले यांना आरोपींची माहिती मिळाली. त्यानंतर तिघांना ताब्यात घेण्यात आले. चौकशीत आरोपींनी गुन्हा केल्याची कबुली दिली. त्यांच्याकडून तांब्याच्या तारा जप्त करण्यात आल्या आहेत.
