पुणे, मुंबई, नागपूरसह २२ जिल्ह्यांत ‘एचआयव्ही’चा सर्वाधिक संसर्ग! सरकारचे आता उपाययोजनांचे मोठे पाऊल

एचआयव्ही संसर्ग अधिक असलेल्या जिल्ह्यांमध्ये रुग्णांचे निदान, उपचार आणि संसर्ग प्रतिबंध या तीन टप्प्यांवर उपाययोजना करण्यात येणार आहेत, अशी माहिती राष्ट्रीय एड्स नियंत्रण संस्थेचे (नॅको) महासंचालक डॉ. राकेश गुप्ता यांनी दिली. एचआयव्हीपासून असलेला सार्वजनिक आरोग्याचा धोका २०३० पर्यंत नष्ट करण्याचे उद्दिष्ट ‘नॅको’ने ठेवले असून, त्याअंतर्गत धोरणात्मक प्रतिसाद कार्यशाळेचे आयोजन करण्यात आले. या वेळी डॉ. गुप्ता बोलत होते. ते म्हणाले, ‘एचआयव्ही नियंत्रणासाठी देश पातळीऐवजी जिल्हा पातळीवरून उपाययोजना करण्यात येत आहेत. त्याचा सकारात्मक परिणाम दिसत आहे. यातून एचआयव्ही संसर्गाचा सार्वजनिक आरोग्याला असलेला धोका २०३० पर्यंत संपुष्टात येईल. महाराष्ट्रातील एचआयव्ही संसर्ग जास्त असलेल्या २२ जिल्ह्यांचा समावेश आहे.’

या कार्यशाळेत राज्याच्या आरोग्य विभागाचे प्रधान सचिव डॉ. निपुण विनायक यांच्यासह नॅकोचे वरिष्ठ अधिकारी, राज्याच्या आरोग्य विभागाचे अधिकारी, जिल्हास्तरीय कार्यक्रम समन्वयक आदी उपस्थित होते.

राज्यातील एचआयव्ही संसर्ग

• एकूण एयआयव्हीग्रस्त रुग्ण – ३.९९ लाख
• एकूण लोकसंख्येतील रुग्णांचे प्रमाण – ०.२९ टक्के

सर्वाधिक संसर्ग असलेले जिल्हे

अहिल्यानगर, अमरावती, बीड, चंद्रपूर, धाराशिव, जळगाव, कोल्हापूर, लातूर, मुंबई उपनगर, नागपूर, नांदेड, नाशिक, पालघर, परभणी, पुणे, रायगड, सांगली, सातारा, सोलापूर, ठाणे, वर्धा आणि यवतमाळ.

संसर्गाचा धोका कमी करणार

महाराष्ट्रात एचआयव्ही संसर्ग जास्त असलेल्या जिल्ह्यांत निदान, उपचार आणि संसर्ग प्रतिबंध या तीन पातळ्यांवर काम केले जाणार आहे. राज्यात सध्या ९० टक्के रुग्णांचे निदान, ९० टक्के रुग्णांवर उपचार आणि ९९ टक्के संसर्ग प्रतिबंध अशी स्थिती आहे. पुढील काळात निदान आणि उपचारांची स्थिती प्रत्येकी ९५ टक्क्यांवर नेण्यात येणार आहे. त्यामुळे एचआयव्ही संसर्गाचा धोका आगामी काळात मोठ्या प्रमाणात कमी करता येईल, अशी माहिती महाराष्ट्र राज्य एड्स नियंत्रण सोसायटीचे प्रकल्प संचालक डॉ. सुनील भोकरे यांनी दिली.