२०५ कोटी वसूल करा, अन्यथा… महावितरणच्या पुण्यातील अधिकाऱ्यांना संचालकांचा इशारा

पालक संचालक म्हणून अग्रवाल दर आठवड्याला पुणे परिमंडलाचा आढावा घेतात. या आढावा बैठकीत त्यांनी वीजबिल वसुली, वीजपुरवठा, सेवा सेतू व सेवा संकल्प अभियान आदींचा उपविभागनिहाय आढावा घेतला. या बैठकीला प्रभारी मुख्य अभियंता ज्ञानदेव पडळकर, अधीक्षक अभियंता सिंहाजीराव गायकवाड, सुरेश सवाईराम, सहायक महाव्यवस्थापक (वित्त व लेखा) कीर्ती भोसले यांच्यासह पुणे परिमंडलातील सर्व विभागांचे कार्यकारी अभियंते, उपविभागीय अभियंते व अधिकारी उपस्थित होते.

अग्रवाल म्हणाले, ‘सप्टेंबर महिन्याअखेर २०५ कोटी ८७ लाख रुपयांची थकबाकी शिल्लक आहे. पुण्यासाठी ही चांगली बाब नाही. ऑक्टोबर महिन्याच्या चालू बिलासोबत ही थकबाकी वसूल करा. पुढच्या शनिवारपर्यंत ही थकबाकी वसूल झालेली असावी. ऑक्टोबर हिटला सुरुवात झाली आहे. त्यामुळे वीजपुरवठ्याकडेही सर्वांनी लक्ष द्यावे. आपापल्या कार्यक्षेत्रातील वीजपुरवठा अखंडितपणे सुरू राहील यासाठी प्रत्येकाने दक्षता घ्यावी, तसेच वीजगळती रोखून महावितरणचा महसूल वाढवावा.’

‘सेवा सेतू आणि सेवा संकल्प अभियानाबाबतही सर्वांनी सजग राहण्याचे आवाहन करताना जास्तीत जास्त किऑस्क उभारून ग्राहकांना महावितरणच्या सेवांचा लाभ द्यावा,’ असेही अग्रवाल यांनी सांगितले.

‘खासगी व्यक्तीकडून काम करून घेतल्यास कारवाई’

दरम्यान, महावितरणच्या वीजयंत्रणेमधील नादुरुस्त ट्रान्सफॉर्मर बदलणे, तांत्रिक दुरुस्ती, वीजबिल वसूली किंवा मीटर काढणे यासारखी कामे विद्युत सुरक्षा नियमांचे पालन करून करण्याची पूर्णतः जबाबदारी तारमार्ग संवर्गातील तांत्रिक कर्मचाऱ्यांची आहेत. अशी तांत्रिक व जोखमीची कामे करवून घेण्यासाठी कोणत्याही प्रकारे खासगी व्यक्ती किंवा अनधिकृत मनुष्यबळाचा वापर करू नये. असे प्रकार आढळून आल्यास व विद्युत अपघात झाल्यास संबंधित दोषी कर्मचाऱ्यांविरुद्ध बडतर्फीसारखी कठोर कारवाई करण्यात येईल असे महावितरणकडून स्पष्ट करण्यात आले आहे. याबाबत संचालक (संचालन) धनंजय औंढेकर यांनी नुकतेच परिपत्रक काढून क्षेत्रीय मुख्य अभियंते व अधीक्षक अभियंत्यांना याबाबत खातरजमा करण्याचे आदेश दिले आहेत.