लोकसत्ता प्रतिनिधी
पुणे : दारु पिण्यासाठी पैसे न दिल्याने एकाने पत्नीवर चाकूने वार केल्याची घटना बिबवेवाडी भागात घडली. याप्रकरणी पतीविरुद्ध बिबवेवाडी पोलिसांनी गुन्हा दाखल केला. कविता संजय लोखंडे (वय ३९, रा. सिद्धार्थनगर, अप्पर इंदिरानगर, बिबवेवाडी) असे जखमी झालेल्या महिलेचे नाव आहे. याप्रकरणी पती संजय सुदाम लोखंडे (वय ४९) याच्याविरुद्ध गुन्हा दाखल करण्यात आला.
आणखी वाचा- येरवड्यात दुभाजकावर आदळून दुचाकीस्वार तरुणाचा मृत्यू
याबाबत कविता यांनी बिबवेवाडी पोलीस ठाण्यात फिर्याद दिली आहे. लोखंडे दाम्पत्य सिद्धार्थनगर भागातील एका चाळीत राहायला आहेत. आरोपी संजय याला दारु पिण्याचे व्यसन आहे. बुधवारी सकाळी त्याने पत्नी कविता यांच्याकडे दारु पिण्यास पैसे मागितले. त्यांनी पैसे देण्यास नकार दिल्याने संजय चिडला. त्याने त्यांना शिवीगाळ केली. मारहाण करुन चाकूने वार केले. पोलीस हवालदार आंग्रे तपास करत आहेत.
