बत्तीस तास ‘गॅस’ वर; मुंबई-पुणे द्रुतगती मार्ग स्तब्ध, प्रवाशांचे प्रचंड हाल

ज्वलनशील असे प्रोपोलीन रसायन घेऊन जाणारा टँकर खंडाळ्याजवळ आडोशी बोगद्याजवळ मंगळवारी सायंकाळी पाच वाजता उलटला. त्यानंतर प्रशासनाने सुरक्षिततेच्या दृष्टीने उपाययोजना सुरू केल्या. पुण्याहून मुंबईकडे जाणारी वाहतूक थांबविण्यात आली होती. मात्र एकच मार्गिका सुरु असल्याने बुधवारीही द्रुतगती मार्गावर वाहनांच्या लांब रांगा लागल्या होत्या. गॅसला आग लागू नये यासाठी टँकरवर सतत पाण्याचा मारा करण्यात आला.

कोंडीत बत्तीसहून अधिक तास अडकलेल्या प्रवाशांचे हाल झाले. अपघातस्थळाजवळ रात्रभर वाहने उभी राहिली. प्रवाशांना अन्न, पाणी किंवा शौचालयाची सुविधा नव्हती. सुमारे २२ तासांच्या अथक प्रयत्नांनंतर गॅस गळती रोखण्यात यंत्रणांना यश आले. त्यानंतर उर्वरित गॅस सुरक्षितपणे दुसऱ्या टँकरमध्ये भरून अपघातग्रस्त टँकर हटवण्यात आला आणि एका मार्गिकेवर वाहतूक सुरू करण्यात आली. त्यामुळे घाट परिसरात वाहतूक संथ सुरू होती. छोटी वाहने जुन्या महामार्गावर वळवून वाहतूक सुरळीत ठेवण्याचा प्रयत्न करण्यात आला. मात्र, या मार्गावरही अवजड वाहने आल्याने लोणावळा–खोपोली आणि खोपोली–खालापूर पट्ट्यात बुधवारी कोंडी झाली.

अपघातामुळे टँकरला तीन ठिकाणी गळती लागली होती. दोन ठिकाणची गळती थांबवण्यात यश आले; मात्र तिसरी गळती नियंत्रणात येत नव्हती. अखेर दुसरा टँकर मागवून अपघातग्रस्त टँकर रिकामा करण्यात आला. भविष्यात असे अपघात टाळण्यासाठी आणि आपत्कालीन परिस्थितीत सक्षम यंत्रणा उपलब्ध राहावी, यासाठी उपाययोजना केल्या जातील. – किशन जावळे, जिल्हाधिकारी, रायगड</strong>