Pune Navale Bridge Accident: पुणे शहरातील नवले पुलावर साडे पाच वाजण्याच्या सुमारास सातारा रोडवरून पुण्याच्या दिशेने येणार्‍या कंटेनर, ट्रक आणि चार चाकी वाहनाचा भीषण अपघात झाला. या अपघातात कार आणि कंटेनरला आग लागली. आगीत होरपळून सात जणांचा जागीच मृत्यू झाला आहे. तर दहा पेक्षा अधिक नागरिक जखमी झाले आहेत. यातील जखमी नागरिकांना जवळील रुग्णालयात दाखल करण्यात आले आहे.

या अपघातात कारमधील तीन वर्षांच्या चिमुकलीसह दोन पुरुष व दोन महिलांचा मृत्यू झाल्याची माहिती समोर आली आहे. कारमधील पाच जण नारायणपूर येथून देवदर्शनाहून घरी परतत असताना हा अपघात झाला. तसेच या अपघातात कंटेनर चालक व एका क्लिनरचा मृत्यू झाल्याची माहिती पोलिसांनी दिली.

स्वाती संतोष नवलकर (वय ३७), शांता दत्तात्रय दाभाडे (वय ५४), दत्तात्रय चंद्रकांत दाभाडे (वय ५८) धनंजय कुमार कोळी (वय ३०) आणि मोक्षिता हेमकुमार रेड्डी (वय ३) अशी कारमधील मृतांची नावे आहेत.

साताराहून मुंबईच्या दिशेने कंटेनर जात होता. नवले पुलाजवळील सेल्फी पॉइंटजवळ कंटेनर चालकाचे नियंत्रण सुटले. त्यामुळे पुढील सहा ते आठ वाहनांना कंटेनर चालकाने उडवल्याने तसेच ट्रक आणि कंटेनरच्यामध्ये एक चार चाकी अडकल्याने आग लागली. या आगीच्या घटनेत सात जणांचा होरपळून जागीच मृत्यू झाला आहे. या अपघातानंतर वाहतूक कोंडी झाली आहे. वाहतूक पोलिसांकडून वाहतूक सुरळीत करण्याचे प्रयत्न सुरू आहेत. दरम्यान, घटनास्थळी पोलीस, अग्निशमन विभागाकडून मदतकार्य सुरू आहे.