पुण्यात गडकरींनाही चुकले नाहीत खड्डे, “हा अज्ञान मार्ग…” म्हणत व्यक्त केली नाराजी

लवळे येथील सिम्बायोसिस आंतरराष्ट्रीय अभिमत विद्यापीठाच्या फेस्टिव्हल ऑफ थिंकर्स या कार्यक्रमात गडकरी बोलत होते. सिम्बायोसिसच्या कुलपती डॉ. विद्या येरवडेकर, कुलगुरू डॉ. रामकृष्णन रमण, वैद्यकीय व आरोग्य विज्ञान विद्याशाखेचे प्रमुख डॉ. राजीव येरवडेकर, कुलसचिव डॉ. एम. एस. शेजूळ उपस्थित होते. गडकरी यांनी ‘पायाभूत सुविधा, तंत्रज्ञान, संशोधन, रोजगारनिर्मिती आणि आर्थिक विकास यांचा परस्परसंबंध’ या विषयावर भाष्य केले.

‘भविष्यातील वाहतूक लक्षात घेऊन रस्त्यांची क्षमता ठरवली पाहिजे. रस्ते, महामार्ग, पूल, बोगदे, जलमार्ग आणि दळणवळणाच्या सुविधा विकसित करताना आजच्या गरजांबरोबरच पुढील ५० वर्षांचा विचार करून नियोजन करणे आवश्यक आहे. चांगल्या पायाभूत सुविधांमुळे उद्योग, व्यापार, पर्यटन आणि रोजगार वाढतो. वाहतूक खर्च कमी झाल्यास भारतीय उद्योगांना जागतिक बाजारपेठेत स्पर्धा करणे सोपे होणार आहे. चांगले रस्ते असल्याने शेतकऱ्यांना बाजारपेठेत शेतमाल पोहोचवणे सोपे होते. ग्रामीण भाग शहरांशी जोडला जातो आणि तेथेही उद्योग व रोजगाराच्या संधी निर्माण होतात,’ असे गडकरी यांनी सांगितले.

‘तंत्रज्ञानाचा वापर करून रस्त्यांची गुणवत्ता तपासणे, ड्रोन, एआय, लिडार आणि उपग्रह तंत्रज्ञानाच्या मदतीने दोष आधीच ओळखणे आणि ‘रिपेअर आफ्टर फेल्युअर’ऐवजी ‘प्रेडिक्ट बिफोर फेल्युअर’ या पद्धतीने देखभाल करणे आवश्यक आहे. ‘नॉलेज विथ एथिक्स’ आवश्यक असून ज्ञानासोबत प्रामाणिकपणा, विश्वासार्हता, गुणवत्ता आणि मूल्ये जपली पाहिजेत. शॉर्टकटने दीर्घकाळ यश मिळत नाही,’ असा संदेशही गडकरींनी तरुणांना दिला. विकासासोबत पर्यावरणाचे संरक्षण आणि आर्थिक प्रगती यांचा समतोल राखणे ही काळाची गरज असल्याचे त्यांनी स्पष्ट केले. विद्यापीठाच्या कुलपती डॉ. विद्या येरवडेकर यांनी प्रास्ताविक केले. तर कुलगुरू डॉ. रामकृष्णन रमण यांनी आभार मानले.