Teacher Recruitment : ‘पवित्र’द्वारे शिफारस झालेल्या उमेदवारांमध्ये गणित-विज्ञान विषयांच्या उमेदवारांचा मोठा टक्का… महिला उमेदवार किती?

राज्यातील शासकीय, खासगी अनुदानित शाळांमध्ये गेल्या काही वर्षांपासून शिक्षकांची पदे मोठ्या प्रमाणात रिक्त होती. त्यात अनेक विषयांसाठी शिक्षकच नसल्याने विद्यार्थ्यांचे शैक्षणिक नुकसान होत होते. मुलाखतीविना निवड प्रकारात उपलब्ध असलेल्या १९ हजार ७५४ जागांपैकी इयत्ता पहिली ते पाचवीसाठी एकूण १२ हजार ६७१ जागा रिक्त होत्या, त्यातील सात हजार ५४१ जागांवर उमेदवारांची शिफारस करण्यात आली आहे. त्यामुळे प्राथमिक शाळांतील शिक्षक सर्वच विषय शिकवणार असल्याने शिक्षकांची कमतरता भरून निघणार आहे, अशी माहिती शिक्षण विभागाने दिली.

राज्यात सर्व स्थानिक स्वराज्य संस्था आणि खासगी व्यवस्थापनांच्या शाळांमधील इयत्ता सहावी ते आठवीच्या वर्गात पाच हजार ४२१ शिक्षकांची पदे रिक्त होती. त्यात जवळपास तब्बल ६४.९० टक्के गणित आणि विज्ञान विषयातील शिक्षकांची पदे रिक्त होती. तर, नववी आणि दहावीच्या वर्गात ३९.२९ टक्के गणित, विज्ञान विषयाच्या शिक्षकांची पदे रिक्त होती. सहावी ते आठवीच्या गटात शिफारस झालेल्या ४ हजार २०७ उमेदवारांपैकी गणित विज्ञान विषयांसाठी २ हजार ६२० उमेदवारांचा समावेश आहे. तसेच नववी-दहावीच्या गटात शिफारस झालेल्या १ हजार ११९ उमेदवारांपैकी गणित विज्ञानाच्या १९१ पदांसाठी उमेदवारांची शिफारस करण्यात आली आहे. तसेच अकरावी-बारावी स्तरावर गणित विज्ञानासाठी १९५ उमेदवारांची शिफारस करण्यात आली आहे. गणित, विज्ञानासह भाषा, भूगोल, इतिहास, सामाजिकशास्त्र अशा विषयांसाठीही उमेदवारांची शिफारस करण्यात आली आहे.

इयत्ता सहावी ते आठवीच्या स्तरावर मराठी विषयासाठी ५०७, इंग्रजी विषयासाठी ४५९, शारीरिक शिक्षणासाठी ३०२, समाजशास्त्रासाठी ७२, इतिहास-भुगोलासाठी १२ उमेदवारांची शिफारस करण्यात आली आहे. शिफारस केलेल्या १३ हजार ११९ उमेदवारांमध्ये महिला उमेदवार सुमारे ६० टक्के आहेत. ७ हजार ३००हून अधिक महिला उमेदवारांना संधी मिळाल्याची माहिती शिक्षण विभागाने दिली.